Si bien ke la mayoria de los Djudios de Etyopya (los Beta Israel, komo se yama la komunidad Djudia de Etyopa) izyeron aliya i se entegraron a la komunidad Djudia global, tyenen sus propyos uzos i tradisyones unikos. Para akodrarmos, una kurta istorya de sus aliya.
La Operasyon Salomon (en ivrit, Mivtza Shlomo) fue una operasyon militar sekreta israelyana del 24 al 25 de Mayo de 1991 para transportar por ayre a los Djudios de Etyopya a Israel. Volos sin eskalas de 35 aviones israelyanos, kon los C-130 de la Fuersa Aeryana de la armada israelyana i los Boeing 747 de El Al, transportaron 14.325 Djudios etyopyanos a Israel en 36 oras. Uno de los avyones, un El Al 747, transporto 1.088 personas, inkluzo dos bebes ke nasyeron durante el volo, i detyene el rekor mundial del mas grande shifro de pasajeros en un avion. Ocho bebes nasyeron en total durante la operasyon. Esta fue la tresera operasyon de aliya de Etiopya a Israel. Antes de esta misyon, uvo dos operasyones similares yamadas Operasyon Moses i Operasyon Joshua.
La Operasyon Moses (en ivrit Mivtza Moshe) fue la evakuasyon sekreta de los Djudios de Etyopya via Sudan durante una gerra sivil ke provoko una ambyertura en 1984. La operasyon Moses, fue una operasyon endjuntos kon las Fuersas de Defensa de Israel, la Ajensia Santral de Intelijensya, la embasada de los Estados Unidos en Hartum, mersenaryos i las fuersas de seguridad sudanezas. Anyos despues de ke se kompleto la operasyon, se revelo ke los muzulmanes sudanezos i la polisiya sekreta de Sudan tambyen prokuraron dokumentos para fasilitar la migrasyon masiva de Djudios de Etyopya afuera de Sudan. Despues de una Reunyon sekreta del governo israelyano en Noviembre de 1984, se desidyo de empesar la Operasyon Moses. A partir del 21 de Noviembre de 1984, empeso el transporto aeryo por Trans European Airways de kaji 8.000 Djudios etyopyanos desde Sudan via Bruksel a Israel, i eskapo el 5 de Enero de 1985.
La Operasyon Joshua, tambyen konosida komo Operasyon Sheba, fue el ponte aeryo de 1985 de Djudios etyopyanos desde los kampos de refujiados en Sudan a Israel. La Operasyon Moses aviya transportado kaji 8.000 personas a Israel desde el 21 de noviembre de 1984 al 5 de enero de 1985, ma kuando esto se vido en la presa, debasho de la presyon de otros paizes musulmanes, Sudan bloko las departuras. Los 100 senatores de Los Estados Unidos firmaron una petisyon sekreta dirijida al prezidente Ronald Reagan, demandandole de kontinuar las evakuasyones. El vise-prezidente George H. W. Bush organizo una misyon yamada Operasyon Joshua. El 22 de Marso de 1985, sesh avyones de transporto Hercules C-130 de la Fuerza Aerea de los Estados Unidos fueron enviados i kaji 650 Djudios fueron lokalizados i transportados al aeroporto de Ovda en el sud de Israel.
En tornando a la fyesta, una de las tradisyones mas importantes de los Djudios de Etyopya es la festividad de Sigd, ke se selebra el 29 de Heshvan (este anyo el 13 de Noviembre). Sigd es una palavra amarika (una lingua semitika avlado en Etiopía) ke sinyifika "enkorvamyento", ma tambyen es relasyonada kon la palavra amarika para “templo”.
Sigd selebra la resivida de la Tora. Se pensa ke empeso en el siglo XV, kuando los Kessim reunyeron a los Beta Israel para enforteser sus morales despues de aver sufriyido un periodo de grande persekusyones. Los Kessim se inspiraron de la deskripsyon del Livro de Nehemya de komo el puevlo ke aviya tornado de Babilonya despues de 70 anyos de egzilo se dediko a bushkar los kaminos del Dio (Nehemya 8:1).
En Etyopya, los Beta Israel se arekojiyan en las simas de las montanyas afuera de sus sivdades. Oy en Israel (Sigd es una festividad legal rekonosida), se arekojen en Yerushalayim en un lugar desde donde se puede ver el Monte del Templo. El dia empesa kon un taanit i se eskapa kon un banketo. Durante el dia, se meldan los Psalmos, i el Orit (la Tora i los livros sagrados eskritos en el antiguo Geez, una lingua semitika empleyada eksklusivamente en la orasyon).
