Keridos Lektores,
Oy no topi algun sujeto para eskrivir. Por esto vos va kontar lo ke pasi en estos kinze diyas dalkavo.
Kinze diyas antes me operi del ojo derecho, porke teniya katarakt. Esto es moda mueva, ke kaje todos los ke vienen a mi edad, lo tienen. En verdad kaliya ke me operara en Febrero 2022. Mos iremos a la Ada, a la torna lo ago, ke pase Rosh Ashana i Kipur lo ago, ke pase el anyo muevo lo ago dizyendo, vinimos asta agora. A la fin kuando ya no estava mas puedyendo ver las eskrituras en la televizyon, i no estava puedyendo konoser mas a los ke me saludavan, me dishe: Agora es. Komo la kantika de Elvis Presley: It's now or never.
Despues de konsultar a mi mediko, un profesor muy mansevo i muy kapachi, desidimos la data i me operi. Grasyas al Dio, komo dizen en turko: Dünya varmış. El Dio ke se lo aklare su mundo es mi bendisyon. Alora kaliya i el sigundo ojo, i akel ojo ya lo bedjereyimos este Jueves. Agora ya puedo ver “al perro SIN durbin”. Dos tres diyas mas de pasensya, i para las gotas tanbien, i espero ke va estar todo maraviya inshalla. No se si va tener de menester de antojos para meldar de serka, vamos a ver.
Agora mis ijas me dizen ke kale ke me vayga al doktor de orejas, porke no esto oyendo bueno. Yo digo ke yo no tengo nada, es eyas ke estan avlando avagariko. I esto esta en el program.
Vine a esta edad bendicho el Dio, es natural ke kale azer unas kuantas reparasyones chikas.
De mas mal ke mos guadre el Sinyor Del Mundo.
