Entre tanto de los konosimyentos perdidos, la destruksyon de la biblioteka de Aleksandriya, ke fue un evenemento progresivo i ke duro algunos siglos konsekutivos, no fue tan maloroza komo la kultura popular mos da a entender. Es ke al pareser tenemos munchos konosimyentos yerrados sovre esta bibliyoteka komo la perdidad de munchas ovras de la antikuedad, ke no fue por modo del insendyo de la Biblioteka. Porke, la Biblioteka de Aleksandriya no era la unika biblioteka de la antikuedad, munchas otras komo la de Pergamo (Bergama) i las de las sivdades grandes del mundo elenistiko ya eran konosidas en akeya epoka. Syerto ke la biblioteka de Aleksandriya era la mas prestijyoza i l mas grande entre las otras. Ama la de Pergamo fue muy importante porke aya se formo lo ke yamamos el Pergamino o el Parshomen. El paro Ptoleme V, no permityo la eksportasyon del Papirus afuera de Misrayim para evitar ke las otras bibliotekas seyan mijor de la de Aleksandria. Ansi es ke toparon el pergamino ke vyene del kuero de la vaka, del kodrero o de la kavra i tanbyen de otros animales. El kuero, despues de kitar el pelo i la grasa kon la karne, se lavora para ke seya muncho mas fina i limpya para pueder eskrivir ensima. Se save ke la tinta puede durar munchos siglos komparando kon el parpirus ke se destruye muncho mas presto.
Kreyemos ke lo mas de los tekstos de la Biblioteka de Aleksandriya fueron kopyados por soferes eskrivyendo ensima de pergamino, i estas kopyas devriyan de toparsen en munchas otras bibliyotekas afuera de Pergamo. Lo ke pasa es ke la tinta dezaperesyendose, la eskritura se pyedre. Lo ke izyeron en los monasteryos kristyanos era de kopyar a mano estos tekstos. Asta ke se invento la forma de imprimir grasyas a Gutenberg. Komo kopyar a mano toma muncho tyempo, pokos tekstos de la antikuedad kedaron asta oy.
LO KE SE KREYE KE ERA LA BIBLIYOTEKA DE ALEKSANDRIYA
Otra koza ke mos olvidamos, es ke aun ke se diga ke la Biblioteka se kemo o se destruyo en supito, en realidad, su kayida duro munchos siglos. Todo empeso en el anyo 145 A.E.K. (Antes de la Era Komun) kuando Ptolemao 8, el godro, porke komiya muncho, dyo el orden de ekspulsar todo los entelektuales estranjeros ke eran Gregos, i kon eyos, el direktor de la biblioteka, Aistarke de Samotrake (Semadirek, una izla grega entre İmroz i Dedeağaç), un entelektual de fama mondiyal. El rey, al lugar de el, metyo a su lugar uno de sus guardyas, Kydas, ke no saviya komo dirijir una biblioteka. Al lado de la inyoransa, la mankura de fondos para mantener el edifisyo, fue otra razon de la kayida. Por fin, la mankura de enteres por Aleksandriya komo sivdad, se adjunto a estas razones para ke la biblioteka perda su fama. El fuego ke salyo myentras ke Jul Sezar intentava de tomar Aleksandriya kemo muy pokos dokumentos dize Strabon, el jeografo ke paso por aya.
La destruksyon final de la biblioteka afito en el anyo 272 E.K. (Era Komun), kuando la reyna Zenobya de Palmyra i el emperador romano Aurelyan izyeron la gerra delantre de Aleksandriya.
