Este anyo el enverano sureyo bastante largo. Entrimos a la mar fina el mez de novembre porke los tyempos estavan kayentes i muy favorables.
El invyerno es una sezon ke a munchos no les plaze porke es yelado. Es la sezon la mas yelada entre las kuatro sezones del anyo. La temperatura abasha muncho i kale vistir uno enriva de otro. La inyeve i las luvyas no se terminan. Los dias son kurtos, se aze presto de noche. Es la sezon la mas yelada del anyo. Tyene lugar entre el otonyo i la primavera.
La palavra invyerno provyene del kastilyano antiguo “ivierno”, del latin popular “hibernum” ke se traduiza komo “sezon invernal”. Sureya del 21 de desembre fina el 21 del marso. En invyerno los dias son mas frios i la radyasyon solar es minimal. Kon la inyeve, el tyempo se konjela, kale azer atansyon a no hazinearmos.
Puedemos komer los legumes utiles para la sanedad komo la kol, el ravano, el apyo, la ispinaka, el brokoli, la karota i otros… Komo frutas se kome, la mansana, la banana, la mandarin, el bimbriyo, la granada, la portokal…
Kale enforteser el sistem immun porke la rezistensya del puerpo se amingua kon el tyempo ke se yela. La grip, la kanserya se ve kaji en todos. Los trokamyentos de las sezones, la nutrisyon irregular son faktores ke aflakan el sistem immunolojiko i el puerpo es pronto a hazinearse. Por esta kavza, spesyalmente en invyerno es nesesaryo de konsumir los alimentos nesesaryos en la kantita ke kale.
- La granada es un antioksidan veritable ke mos proteja de las hazinuras.
- La mansana es amiga kon el sistem dijestivo. En el kontenido tyene los vitamines A, E, B6, K ke enfortesen el puerpo.
- La mandarin, la portakal, el greyfurt i el limon son rikos en vitamina C. Enfortesen muestra immunidad i gerrean kon las enfeksyones.
- La sevoya i el ajo son los alimentos yenos de antioksidan i mos protejan kontra el kanser, son komo antibiyotikes naturales.
- El yoğurt es un alimento yeno de probiyotik ke proteja los intestines, i los guesos.
- Los champinyones kontyenen los vitamines B12 i D. Es por esto ke mos proteja kontra la hazinura maldicha del kanser, i a parte de esto kontyene el vitamin C, el fosfor, el potasyum ke son muy utiles i
muy efikazes para protejar la salud del korason.
El invyerno es maraviyozo por 10 razones.
- La inyeve es tan ermoza ke kuvre la tyerra komo una manta blanka i krea una fotografiya pitoreska.
- Se puede azer ski, snowboard ke son los spores emosyonales, al lugar de asentar debasho el sol i delantre la mar.
- El invyerno es la epoka de vistir los botes ke azen sentir ke kaminas sovre las nuves.
- Se kome supas kayentes, kastanyas asadas, i galetas kon kanela. Komidas rekonfortantes.
- No ay nesesidad de tener un puerpo fit, ke karar de godro estas, manko friyo tyenes. No te yelas.
- Se respira profondamente el ayre mas fresko en una montanya durante el invyerno, no va aver kontaminasyon de alerjias.
