En el Muzeo Djudio organizamos kon la Kamareta de los Giadores d’Estanbol un Seminario de Edukasion para los giadores sovre el Djudaizmo Turko; su istoria, las fiestas Djudias, las sinagogas en Estanbol, el antisemitizmo en el mundo i en muestro payiz; la diferensia entre un Djudio Turko i un Israelyano. I eskapamos dandoles informasiones sovre las komidas kasher en Estanbol, i komo se pueden merkar. Los tres lugares ande se topa i se kome komidas kasher. I ande kale telefonar antes de vijitar syertas sinagogas en Estanbol, en Brusa, en İzmir, en Çanakkale,… I las donasiones ke se deven de azer. Oy en diya estas sinagogas para ke sean vijitadas por los turistos, mizmo los Turkanos son ovligados de azer lavorar a lo manko dos personas i una o dos para la seguridad.
I devemos de dar detalyos a estas personas ke van a estar endjuntos kon estos turistos.
La semana pasada kon muestra direktrisa, Nisya Allovi izimos un torno en la Kula kon 45 giadores. Empesando del lugar de la sinagoga Knesset Israel ke era yamada el Kal de Apollon porke se topava djusto al lado del Sinema Apollon. I ay unos kuantos mezes ke eskrivyeron “Apollon i la data ke fue fraguada” ensima del edifisio. I dospues vimos la estatua de Pas ke fue realizada dospues del atako teroristo del 15 Novembre 2003. El sinyor Mişel Horada, prezidente de la Sinagoga, mos aresivio en el kal de los Frankos (el kal de los Italianos) i pudimos eksplikar la istoria de la Komunidad Estranjera.
Era por la primera vez ke los giadores pudieron vijitar el Orno de Matsa. I dospues en la Kaleja Serdar-ı Ekrem pudimos mostrar el Kamondo Han, el apartamento Asseo i Brounstein i el Botton Han ke apartenia al famozo fabrikante de papeles de sigaros Mair de Botton i ke oy en diya es el famozo apartamento “Doğan Apartmanı”.
Dospues ke vijitimos el famozo Kal Or Hodesh, kontando su istoria trajika, entrimos al Kal de los Ashkenazes. I kontimos su istoria kon la istoria de los Ashkenazes en muestro payiz i en muestra sivdad.
En frente del kal de los Ashkenazes tomimos una foto todos endjuntos. I de aya vijitimos el Hotel Kamondo ke era la kaza del Kont Abraham de Kamondo. Es aya ke pudimos kontar sovre los Kamondos i todo lo ke izieron por muestra Komunidad i por muestra sivdad. Dospues en el Schneider Tempel fuimos resividos por su presidente, İzel Rozental i es el ke mos konto la istoria de la sinagoga i del sentro kultural.
Abashando por las Eskaleras de Kamondo, eskapimos muestro torno de Galata en la Sinagoga Zulfaris ke era el primer nido de muestro muzeo.
