La Libreriya Nasyonal de Israel edito un artikulo eskrito por Ayala Deckel en 1922 sovre Hanuka dizyendo ke fue una mujer ke dyo la sentiya para ke los ermanos Makabim se revolten kontra la otoridad de los Seleusides. (Reynado formado por Seleuse, jeneral de Aleksandro el Magno, ke despues de su muerte, se apropriyo de la rejyon del Medyo Oriyente).
Sigun el Midrash, el milagro de Hanuka se baza sovre una mujer muy korajoza ke se atrivyo a dizir a boz alta la koza ke todos saviyan i ke no keriyan dizir. Esta deklarasyon izo ke sus ermanos se revoltaron. Eya se yamava Hanna, ija de Matatyahu, ermana de los Makabim. Yene sigun el Midrash, en este reynado aviya la tradisyon de dar al governador el derecho de violar la mujer rezin kazada la primera noche del kazamyento. Una tradisyon ke se dize ke egzistiya en la epoka de la edad medya en los payizes de Evropa. La mizma koza se enkontra en la epopea de “Gılgamısh” ke se dize ke fue una fuente por las eskritas de syertos livros. Al pareser ke los Hashmonaim akseptaron este derecho los ojos serrados.
Vino el diya del kazamyento de Hanna, i eya desidyo de meter una fin a esta tradisyon angustyada. En la selebrasyon de la noche de la boda, se alevanto, delantre de los envitados, su madre, su padre, sus ermanos, empeso a arazgar su vestimyenta i kedo deznuda dizyendo: "Me keresh matar porke me dezonori delantre de vozotros ama no tenesh dinguna reaksyon porke me va ir a la kama del governador esta noche al lugar de la kama de mi novyo”. Sigun el Midrash esta fue la sentiya ke izo revoltar los ermanos Makabim.
Kuando avlamos de Hanuka, mos referimos syempre a la istorya de la azete ke duro ocho diyas. Esta istorya de Hanna no es de nada konosida. Puede ser por el kontenido yeno de verguensa ke no fue kontada, ama syertas komunidades Ashkenazi de Evropa mensyonan una istorya similar sin dar el nombre de Hanna, dizyendo simplemente: “Bat Hashmonai”. “Ija Hashmonai” Algunos investigatores pretenden ke “Bat Hashmonai i Judith son la mizma persona. Sigun Rashi el grand savyo, fue el eroizmo de una mujer ke esta detras de la istorya de Hanuka. Ademas ke ay una grande similitud entre la palavra Hanuka i el nombre Hanna. Es por esto ke las kandelas oy son ensendidas por mujeres en munchas partes del mundo Djudyo.
Akavando su artikulo, Ayala dize ke Hanna es la boz de las mujeres ke tuvyeron de estar en silensyo desde munchos siglos asta oy, ke deven de defender los derechos umanos de las mujeres, ke una verdad, mizmo ke seya kruela i doloroza puede tener su milagro para ser kurada.
