İzzet Bana
Esta semana eskaparon dos anyos desde ke lo pedrimos a muestro kerido amigo, Selim Hubeş z”l, ke este en Ganeden.
Kuando biviya, aparte del echo ke teniya de kontabilita, se okupava kon teatros i muzika. Teniya koleksyones de CDs, de livros, de instrumentos muzikales, teshpihes, arabas minyaturas, pipos, etc.
La semana ke pasimos, su mujerika bivda ke desho (ke biva munchos anyos), Rozet Hubeş, donó una parte de los instrumentos muzikales (loke pudyeron tomar) a la Eskola Judia.
La Koordinatora de la Eskola de Ulus ke se yama Sra. Röne Kaspi, i su ekipo hueron a la kaza de Rozet i tomaron los instrumentos ke les dyo Rozet. I eyos los metyeron en una kamareta en la eskola ande los pueden ver los elevos de la eskola. Kualo no aviya: Ud, gitarras, lir, baglamas, violonsel, kontrebas, cümbüş, mandolin i un monton de perkusiones de diferentes paizes.
I esta semana Röne Kaspi i el ekipo, yamaron a Rozet Hubeş a la Eskola para amostrarle lo ke prepararon. Kon mi, Jojo Eskenazi i su mujer, Tuna Eskenazi, Renan Kohen, las prezidentes i dirijentes del la fondasyon de la skola mos topimos en un salon kon tratamientos ke mos anprontraron delantre una meza grande. I avlimos de Selim. Komo parvino a topar estos instrumentos durante en la vida ke tuvo.
Yo en primero amostri en barkovision una parte del filmo dokumental ke se aviya travado por el Sr. Ridvan Şentürk.
Rozet avlo komo una anekdota sovre komo Selim izo inchir la kaza kon instrumentos. I vino diya ke no kavyeron en sus kazas. Desharon la kaza kon los instrumentos. I pasaron a una otra mueva kaza para pueder bivir komo se deve.
I yo konti komo sin ke sepa Rozet mozos, los Pasharos Sefaradis, yo, Karen i el ermaniko, Yavuz komo le ayudavamos a trayer de los paizes ke kaminavamos en el mundo. Sin ke sepa Rozet. I kuando se aperseviya ke komo se arekojo tantos instrumentos pishin mos metiyamos a riyir.
A lo ke kontaron los dirijentes de la eskola, ke los elevos tanto les plazyo, kijeron tokarlos. I el profesor les dyo la posibilidad de darselos a tokar kon grande tino ke no se rompan. I hue una alegria entre eyos. Indimas a lo ke konto la prezidente de la mestra de la eskola. Los ijikos i ijikas kuando vieron estos instrumentos se kayaron, se estuvieron kalmos, para ke la profesora ke se konvense a darles a eyos para tokarlos komo keriyan.
I lo ke keriya Selim era esto. Ke token los ijikos, ke se ambezen la muzika i la kultura.
Duspues mos alevantimos de la meza i mos huimos al salon ande se preparo los instrumentos. Rozet i mozos mos emosyonimos de ver la ermozura ke se preparo.
Mos travimos fotografia. I esto vo lo esto partajando kon vozos.
Ganeden bueno ke tenga Selim ke parvino a dar un gozo al futuro.
