Empesando del 7 Octobre se bivio una trajedia en Israel i en Gaza. Empesando por los dirijentes de Katar i Ejipto, kon sus esforsos realizaron un “akedar fuego” de 4 diyas; kon un troko de 150 prizonieros (mujeres i kriyaturas) Palestinianos kontra 50 rehenes Israelyanos (mujeres i kriyaturas) kon el ayudo de la Kruz Kolorada.
I noche de Shabat empeso el primer troko. Los miembros del Hamas liberaron 10 Taylandezos, 1 de los Filipines i 13 Israelianos. I la Armada Israelyana trusho los Israelianos a Tel Aviv. Dospues de dos diyas los 26 primeros rehenes fizikamente no estavan en un estado muy trajiko. Espero ke va ser la mizma koza por los otros rehenes.
Kon este troko mos ambezimos - a lo manko yo - ke ay una grande populasion taylandeza en Israel i lavoran en Israel. Mos ambezimos ke mas de 30.000 taylandezos lavoran en Israel; i la mas grande partida en el sud de Israel en los terrenos de agrikultura.
La sigunda noche al lado de 13 israelyanos vimos 4 otros taylandezos. I savemos ke los terrenos de agrikultura se topan en el sud del payiz serka de Gaza.
No se si van a reushir a kompletar este troko. I esperamos ke los dirijentes del Katar van a reushir a alargar dos o tres diyas mas para ameliorar la situasion i para trokar mas muncho rehenes israelyanos kontra prizonieros palestinianos.
Ke no mos pareska ke estos evenimientos son la fin de la gerra. Espero ke sea, ma kreo ke no va ser; porke Israel kere liberar el norte de Gaza de todo modo de miembros del Hamas.
Esperamos ke van a realizar una pas sana i ke va turar muncho tyempo.
