La fiesta de Hanuka es un evenimyento muy alegre, chikos komo grandes fiestan kon amor las 7 fiestas prensipales del Judaizmo: Rosh Ashana, Kipur, Pesah, Shavuot, Sukot, Purim. Hanuka es la sola fiesta ke no esta mensionada en el Tanah. Todos los detalyos enriva de esta fiesta i la famiya de Hazmonaim Matatya i sus 5 ijos de ande se alevanto la revolta kontra el Imperyo Grego, la gerra, las viktoryas de Yehuda Makabi, los martiryos, los konosemos del livro de Makabe ke fue eskrito en Grego. Hanuka lo toparemos solo en la traduksion ke se yama la traduksion Septante (La traduksion de los setenta ke se yama tan bien la Vildate). Segun una leyenda puede ser verdadera en el tyempo del galut grego. "El Ivrit se aviya kaje desparesido dentre los Judyos asimilados i mizmo los gregos estavan kuryozos de saver lo ke konteniya este livro maraviyozo. Ansi mandaron 70 savyos a Alexandriya, los metyeron kada uno en una kamaretika para ke traduizen el Tanah ke yamaron Biblia (El Livro), par mirakolo los 70 savyos traduizaron biervo por biervo totalmente de la mizma manera el texto entero de la Biblia. Dunke todos los evenemyentos de esta perioda de los Makabes ke konosemos fueron tomados de este livro donde 2 solos mos kontan lo ke savemos de Hanuka. El primer livro mos avla del Reynado de Antiohus en alavando tambien a la famiya de Hazmonayim i el Shef de la revolta de Yehuda A Makabe ke alevanto una armada flaka de 3.000 a 4 000 kombatantes ke no teniyan dingun saverisyo de gerra i ke de los materyales de lavores izyeron armas, se alevantaron kontra una armada de 14 000 kombatantes gregos. El livro es eskrito en mizmo stil del Tanah ke tambien empesa i eskapa kon biervos asemejantes ke dize ke este livro fue eskrito un siglo despues de la muerte de Yehuda A Makabe. La inogurasion del templo purifikado i el miraklo de la gota de azete ke kemo 8 diyas topamos tambien el Dekreto de fiestar de anyo a anyo la fiesta de las Luzes, Hanuka del 25 Kislev durante 8 diyas. Topamos tambien kantes i poemas, la version del livro Ebreo ke se peryo i no tenemos ke la version Grega ke es la versyon de todas las traduksiones de la Biblia aktual. El sigundo livro de los Makabis no es la kontinuasion del primer; es un rezume eskrito por un Judyo, (Yahya) Jason. Yehuda A Makabe, Shef de la revolta de la viktorya de los Judyos kontra (Mikomor) 160 anyos antes la era kristiana Este livro konta endefinitivamente el eroizmo del puevlo Judyo i de las madres Judiyas ke tomaron la traduksion para mentener la Fey por el Kidush Ashem. Antes de avlar de la istorya de Modiin, nido de nasimyento de los Makabis mos akodraremos una ves mas de la Menora del Bet Amigdash ke teniya 7 brasos i la hanukiya tyene 8 ke es el braso del Mirakolo, Mirakolo moderno de la (8) ochena fyesta de Israel, diya de Endependensya ke konosemos todos. Agora konoseremos a Modiin ke es un sembol de la famiya de Makabi. Modiin es un chiko kazaliko ke se topa en los Montes de Yehuda donde en la epoka de los Makabis sus moradores eran kultivatores de vinya kon un sistem de terasas, deskonosido por todos a esta epoka. Aki ampesa la revolta i aki estan enterrados los Hashmonaim Matatya i sus 5 ijos. En este lugar Simeon unos de los dalkavos ermanos de Yehuda fraguo un monumento luksiozo a la memorya de sus keridos. El nombre de Modiin no se topa en la Tora i por la primera ves se topa en el eskrito del livro de los Makabis en la Mishna este nombre aparese komo Modeit se dize ke la rasina de este nombre tyene de Odaa ke kere dizir dar haber i ke aki aviya un lugar ke dirijava el kamino derecho ke se iva al pelerinaj a Yeruzalem en las fyestas de Pesah, Shavuot i Sukot.Avsevyon eskrivano i historyano Grego ke eskrivyo teksto sovra la Geografiya de Erest İsrael mos dize ke este lugar era serka del norte Lod ande se topa la tomba de los Makabim sigun la karta Geografika echa en el kuatren siglo de muestra era kon mozaikes de kolor muy ermozas i se ve en eya la imaje de una kaza kon 2 kulas i al lado ay una eskrita ke dize (De aki salyeron los Makabis). Fasta la gerra de Endependensya se topa aki un köyiziko arabo del nombre de Adya al lado de la tomba de los Makabis. Los arkeologos ke izyeron bushkidades no toparon a ke epoka ampeso la enstalasion de los Judyos. En este sentro moraron poko tyempo antes la revolta kontra Anteohus i se pensa ke este lugar fue abandonado en los diyas de Rabi Akiva, kijo dizir en la epoka de la sigunda destruksion del Bet Amigdash de Roma. Los Arabos yamaron este lugar Araraf (El Monte) Los arkeologos toparon aki 24 tombas ke pensan ser las tombas de los Makabis ke los Arabos yamaron Kabor del empesijo de monte Yahud. En el anyo 1945, ampeso la tradision del pelerinaje de Hanuka; se asemblaron al torno de las tombas grupos sportivos Makabis i asendyeron la torsa sembolika. Esta torsa fue trayida de Tel Aviv por diezenas de koredores mansevos fasta esta sivdad. En el anyo 1950, se fikso la tradision en kada Hanuka de trayer la torsa arelumbrada de Modiin a Yerushalayim. Kada anyo se fiesta los Makabis. Antes mizmo aki en el tyempo del lmperyo Otomano me kontava mi padre (Ke este en ganeden) aviya el grupo Makabias ande el aziya parte, ke kaminavan kon kamizikas blankas i la Bandyera en las kayes de la sivdad. Kada anyo los Makabiates se repetan kon alegriya i antuzyazmo en Israel.
