La agua es un elemento primordial de la vida. La agua dá nasimyento a todas las kriansyas.
Estambol, entre munchas partikularidades ke tiene, se konose también komo el sentro des las aguas naturales. Akueduktos, lagos, rios (chikos i grandes) azen parte de esta sivdad unika. Büyükdere, Tarabya, Göksu, Küçüksu, Kurbağalı dere (Dere de Ranas), son aguas ke koryen en la sivdad. Se puediya también pasear en barkas, noches de lunares kantar i tanyer instrumentos de muzika, i en diyas de buen tiempo azer piknik. Fuentes/Çeşmes eran los símbolos de Estambol. Un buen egzemplo es la fuente monumental ke keda delantre del Palasyo de Topkapı, en Üsküdar, en Tophane.Una kostumbre importante i de alta valor son los Sebiles komo el de Dolmabahçe o Bahçekapı. Seya dinyitaryos, seya la munisipalidad konstruiyan fuentes para la distribusyon de las aguas i munchas vezes sumos de frutas i sherbet koryiyan de estas fuentes de las kualas la djente veniyan a yenar sus bakraches.
En la sivdad de Estambol, desde la epoka Bizantina i más antes se topavan depos de agua. Sisternas komo Yerebatan, Zeyrek, Binbirdirek son unas kuantas de estas rezervas.
Rezervas de agua a ayre libre fueron yamadas ‘Çukurbostan’. En las Adas, kada kaza devia de tener una sisterna i se aprovechava de esta agua en epokas de sekiya o de poka luvya. En las sisternas se enkolgavan sestos, ande se metiya kalderas de komidas kozidas, para ke no se agreyen en diyas de kalor del enverano. Las sisternas eran siempre de temperadura freska. Los karpuzes saliyan komo buz i se komiyan kon las borekitas de berendjena, i los melones kon kezo blanko se tomavan kon una kupika de raki. La agua se konsiderava buena i de kalidad si era livyana i si no dava agruras. Aviya djente ke se entendiyan de agua buena i puediyan saver la provenensya de la agua. Taşdelen, Sırmakeş, Çırçır, Hünkar, Kocataş, Yakacık, Karakulak, Kestane, Sultansuyu, Kayışdağı, eran muy makbul i munchas vezes se merkavan en Damadjanas, resipyentes de vidriyo, protejidas en sestos para ke no se rompan. Otra tradisyon de la sivdad, eran los Sakas. Estas aguas nasen entre montes i vayes i tienen la propriedad de kurar los kalkulos (piedras ke se akumulan en los rinyones).
Tener esta kantidad de aguas buenas en muestra sivdad i país es una bendisyon. Unas kuantas dichas sovre la agua:
< Avril aguas mil.
<Agua de Mayo, pan para todo el anyo.
<Agua ke no puedes bever, deshala koryer.
<Kuando el dere sona, es ke agua yeva.
<Agua koryendo no mata la djente.
<Agua ke no korye puede ser envenenada.
<Nunka dirás, de esta agua no bevere.
<Ni firma algo ke no meldas, ni beve agua ke no veyas.
<Seyamos santos komo la agua.
Komo dize la kantika: <Bre Sarika bre, trayeme un vazo de agua>
A vermos, sanos i rezyos.
HAG SAMEAH
