Kuando oyi esta fraza me enkanto i pensi ke devo de eskrivir para pensar mas muncho sovre su filozofia. Bushkando, vide ke es el titolo de un livro eskrito de Miguel Angel Olivan.
En realidad, los peshkados muertos i bivos nadan en favor del koriente. Para nadar kontra, lo ke es bastante difisil, el peshkado deve de ser muy muskulozo i espierto. Esta dicha se puede aplikar a muestra vida tanbien. La mayoria de las personas preferan la komodidad i no les plaze salir de sus zonas de konfor. Sigen siempre el mizmo kamino i jeneralmente repetan, sin muncho pensar, las ideas de otras personas. No es fasil de nadar kontra el koriente, ma una vez ke provamos de romper muestras paredes, konstruidas por mozotros mizmos, puedemos enkontrar las kapasidades ke tenemos i munchos kaminos muevos mos se avren. Dizen ke “si krees ke puedes, ya estas en medio kamino”. Todos muestros esuenyos se pueden realizar, si se tiene el koraje de persegirlos. El rezultado de este tipo de eksperiensia mos aze bivir en pas kon muestra kaveza i muestro puerpo.
En Israel, todos los mansevos, despues del servisio militar, pasan un anyo en viyajando el mundo. Kaminar, ver, deskuvrir ayuda a la persona a konoserse, a perfeksionar sus kapachedades i a ser un umano individual libre i viene a un estado de tomar sus propias konviksiones i valores, sin estar debasho de la influensia de dingunos. Esto proviene del koraje de pueder nadar kontra el koriente i este puevlo, ke nada kon munchos esforsos kontra el koriente, se izo, komo dize el profeto Isaiah, “una luz entre las nasiones”.
HANUKAH ALEGRE i KONTINUAREMOS A SER LUZ, ROGANDO PARA LA PAZ EN EL MUNDO.
