En una akademia de relijyon avia un ombre djusto i bueno ke kada demanyana en la klasa de Gemara aprontava kafe a los estudyantes. El savia kada uno komo beve su kafe. Sin asukar, kon poko asukar, dulse i otros. Este sinyor tenia una manya ke dava solo medya kupa de kafe. A los ke keren le dava sigunda o tresera kupa ma todas las kupas eran medyas. Dingunos no demandavan la razon i el no kontava.
Un dia este sinyor se izo hazino. Le disho al ijo de aprontar kafe por la manyana. Le dyo al ijo la lista de los estudyantes i kada uno komo le plaze bever kafe. El ijo se alevanto por la manyana i se fue a la akademia por azer el echo del Padre. Empeso aprontar para kada un kafe komo les plaze. En este momento lo vido al padre ke vino a la akademia.
Le disho “Padre mio. Estas hazino i yo esto aki. Vate a kaza i repozate un poko.” El sinyor le disho al ijo. “No pasha. Me olvidi de dizirte una koza muy emportante. Kuando vas a aprontar las kupas, vas azer atansyon ke esten medyas kupas. Esto es muy emportante.” El ijo se maraviyo de esta koza i le demando al padre la razon de este akto.
El padre le disho a el “mira presyado oye mi boz. En la lisyon de Gemara ay dos vyejos kon las manos tremblando. Si estan las kupas yenas se puede vazyar el kafe i se puede kemar el vyejo. I tambien se puede vazyar la kafe enriva de los livros i el vyejo se puede averguensar. Por esto yo esto sirviendo medya kupa de kafe para todos.”
De aki se embezan los savyos de dar onor a las personas i no averguersarlos en publiko. Este akto yeva grandes lisyones i “musar – etika” aryento. Por el merito de los sayyos i la Tora ke se embezan, el Todo Poderozo ke mos guadre de todas setensyas fuertes i malas i ke mos mande la paz a el mundo i a la tierra santa de Yisrael, amen.
