Ya savesh ke el Muzeo Djudio de Turkiya esta organizando kursos para los gias. El sujeto es “Los Djudios de Estanbol, de Turkiya, el Djudaizmo i el turizmo djudio en muestro payiz”. Es la segunda vez ke organizamos estos kursos sin tomar paras, kon el apoyo de diferentes Organizasyones de Institusiones Sivil. Es kon la direktrisa del muzeo, Nisya Allovi ke organizamos estos semineres. Kada vez el seminaryo inkluye 15 konferensias i 4 tures turistikos (en Galata, Balat, Hasköy i Kuzguncuk). La semana pasada organizimos el torno de Hasköy.
Avlimos kon Nisya i no keriamos mas de 40 personas en estos dias. El IRO (la Kamara de los Gias d’Estanbol) izyeron un anunsio i mos dyeron una lista de 70 gias. Era muncho. Kada vez los 70 por syen partisipan a los tures. Aviya luvia i era a las 10.30. 70 personas partisiparon i estavan muy kontentes de pueder vijitar los sitios djudios de Hasköy. Empesimos el torno dando syertas eksplikasyones istorikos sovre Hasköy i vijitimos la vyeja sinagoga Ezger ke fue transformada en una biblioteka por la Munisipalidad de Beyoğlu. Dospues empesimos a suvir el yokush vijitando i dando eksplikasyones sovre la sinagoga Mayor. Avlimos lo ke deviamos de azer en el 2010 i la ekspozision ke se realizo kon Serge Spitzer. Indomos al kal de los Karayes i la Sinagoga de Abudara, amostrimos la kaza del Hahambashi; i el lugar ande se topava la Eskola de la Aliansa de las Ijas de Hasköy.
Vijitimos la Sinagoga Abudara i ayi pudieron ver la dezgrasia… Dimos syertos detalyos i eksplikasyones sovre el Kahal de los Karaim. I de aya fuimos a la Sinagoga Maalem ke fonksyona dainda.
Indomos al Moshav Zekinim, tuvimos la posibilidad de ver la Eskola de la Aliansa para los Ijos. Eskapimos muestro torno pasando por la Sinagoga Sinyora, i mostrando ande era la Eskola Kamondo en Piri Paşa. Mizmo amostrimos la fuente ke se topa enfrente de la eskola de Kamondo i ke es yamada “Yasef Efendi Çeşmesi”.
Dospues del torno ke fue bastante apresiado; syertos gias embiyaron mesajes kritikandomos i kritikando los dirijentes de la Kamara de los Gias porke organizaron un torno ke tyene el sujeto de los Djudios, kuando los Israelyanos estan matando kriaturas i mujeres en Gaza!
La mas grande partida mos dyeron apoyo dizyendo ke el torno organizado no teniya dingun dar i aver kon lo ke se pasa en Gaza.
