Yo, kuando era chika, era muy flaka i nunka no teniya gana de komer. (Oy en dia, no pudeo dizir la mezma koza!) Me akodro para ke komyera una kyoftika se estruiya el mundo. Por esto el dover de darme a komer lo aviya tomado mi tant Ester; era tan pasensyoza, fin ke no kedava una migita en el plato, topava de kontarme konsejikas.
Vos va kontar una de sus konsejikas (oy muy aktual) ke no me olvidi nunka.
“En una sivdad biviya un ombre muy riko. Posedava kampos i vinyas, kazas, butikas, el mizmo no saviya el kuento. Tanto era riko, tanto era fuerte i no se adjideava de dingunos. Todos los ke biviyan en esta sivdad lavoravan para el i no deshava alevantar kavesa a digunos. Si alguno le keriya dizir lo djusto, sin pensar lo kitava del echo i lo deshava sin komer.
Kada noche dava pransos, todos los ke viniyan a komer i a bever le davan razon a todo lo ke diziya i lo enaltesiyan sin ser meresido.
Este ombre kruel, teniya un moso muy djusto i sensero.
El solo le puediya avlar i darle konsejos, mizmo ke no lo sintiya i lo arebashava. Ma el no se enfasyava de dizirle lo djusto.
Un dia uno de sus butikaryos no pudo pagarle la kira, el sin adjidearse le tomo la butika i los bienes de la mano i lo echo a la kaye.
Torno a su kaza, lo yamo al moso para ke apareje un buen pranso para akea noche.
El moso ke ya saviya el kavzo no pudo rezistir a esta endjustisya i le disho:
“Sinyor, esto ke izo no es djusto, oy esta en sus fuersas ma viene dias ke pagan djustos por pekadores”.
El se riyo i se burlo de todo lo ke le disho el moso i lo grito:
“Tu ke saves! Fuersa es paras! Fuersa es bien! Tu mira tu echo, apronta la meza i no te meskles en kavzos ke no te kuadran” .
Paso anyos, el se izo mas riko de lo ke era. Una noche en estando komyendo i bevyendo viene el moso i le dize ke el ijo regalado esta muy hazino. El desho a todos en la meza i se fue koryendo allado de su ijo . Lo ve ke esta kemando de kayentura, pasado de si, echado en la kama.
En gritando dyo orden ke vengan todos los doktores de la sivdad, ma malorozamente dingun doktor no se estava entendyendo de la hazinura ke teniya el manseviko.
Todos los ke viniyan a komer i a bever no estavan demandando ni sonandole la puerta, mas ke el moso sensero rogando al Dyo dia i noche refua para el mansevo.
Dias i mezes pasaron, el mansevo no alevanto kavesa, el padre kansado, sin durmir, una noche, fue a la ventana, avyo las manos a los sielos i empeso a rogar:
“Oh mi Dyo! Te rogo todo lo ke posedo esto pronto a darlo solo mi ijo ke se aga bueno mas no kero nada.”
En supito le viene una boz de leshos:
NI EL RİIKO KON SU RİIKEZA NİI EL BARAGAN KON SU BARAGANİIYA
