Komo de uzo esto mirando a perkurar sujetos relatados al mez koryente. Este mez es el aniversaryo de la muerte de una damma de una intelijensya briyante.
En un tyempo, una epoka en la ke se konsejava a la mayoría de las mujeres mansevas de topar un marido konvenivle, Rita Levi-Montalcini (una kombinasyon de los nombres de su padre i su madre) sonyava desde su chikes a parvenir en una karyera en medisina. Su preferensya en la eleksyon de medisina empeso despues de la muerte de uno de sus serkanos achakes de un kanser de estomago. Despues de ke su padre, un kreyente absoluto ke una edukasyon demazyada no era buena para las mujeres (!), finalmente konsentyo, Levi-Montalcini se tomo por buto un program intensivo sovre todas las kozas ke no se aviya embezado en la eskola segundariya de ijas.
Levi-Montalcini no estava segura si keriya dedikarse a pratikar la medisina o a la investigasyon en la medisina kuando entro i empeso a estudiyar en la Fakultad de Medisina de la Universidad de Turín en Italia, en el empesijo de la dekada de 1930. Eskapo diplomada “summa cum laude” (Summa cum laude es un titulo onorifiko utilizado por las institusyones edukativas para endikar un titulo obtenido kon la mas alta distinksyon) en medisina i operatora en 1936 i de vista empeso a estudiar neurolojiya i psikolojiya.
Malorozamente, el fakto de ser Djudia la ovligo a tornarse a la investigasyon i la grande parte de la investigasyon ke realizo se realizo en el laboratoryo de su kaza i no en la universita. En 1938, las leyes rasyalas implementadas por el governo fashisto de Mussolini defendyeron a los Djudios de kontinuar en las karyeras akademikas i profesyonales.
Levi-Montalcini se instalo en Bruxelles para kontinuar sus estudios, ma fue ovligada de tornar poko despues kuando las fuersas almanas empesaron a avansar verso la Beljika. Achakes ke no podiya tomar un posto profesyonal, Levi-Montalcini enstalo un laboratoryo en su kamareta de echar i empeso a investigar sovre embriones de poyos i el desvelopamyento del sistema nerviozo. A eya se adjunto su profesor, Giuseppe Levi.
En 1941, Levi-Montalcini i su famiya (madre, padre i su ermana buchuka) fuyeron de Torino i se dirijeron verso un kampo serka de Floransa, ande bivyeron eskondidos. Durante este tyempo, Levi-Montalcini tomo guevos fertilizados de los agrikultores lokales para sus investigasyones.
Despues de la gerra, Levi-Montalcini publiko los rezultados de sus investigasyones, lo ke atiro la atansyon de Viktor Hamburger, i la envito a realizar syertas investigasyones en la Universidad de Washington en St. Louis, Missouri. Esto se rezulto en una diploma de dochent i mas despues en un diploma de profesor. Durante este tyempo kontinuó sus investigasyones sovre el sistem nerviozo umano. En el empesijo de la dekada de 1960, Levi-Montalcini divizo su tyempo entre Saint Louis i Roma.
En 1986, Levi-Montalcini resivyo el Premio Nobel de Fizyolojia/Medisina djunto kon su co-investigador Stanley Cohen. Torno enteramente a Italia despues de su retratamyento i kontinuó sus investigasyones i fundyo institusyones para futuros deskuvrimyentos sientifikos.
Levi-Montalcini muryo el 30 de Desembre de 2012, el 17 de Tevet ke es 29 Desembre este anyo, a la edad de 103 anyos.
