Yagil Yaakov morava serka de la frontiera de Gaza kon sus ermanos i sus paryentes. Eran una famiya muy kalma. Teniyan una vida muy normal. Yagil iva tener Bar Mitzva un diya de estas semanas. La famiya entera estava muy emosyonada. La madre le kijo azer un regalo spesyal para sus 13 anyos. Se fue ande un sofer i le izo aparejar una tallega, kon tefilines i tallet brodado kon su nombre ensima.
Ma un diya ke deviyan tener alegriya ke era el dalkavo diya de Sukot, el 7 de Oktubre, afito una dezgrasya ke no se asperava del todo i uvo matansinas kon muertos i arevatados. Tanbien Yagil fue arevatado. En su kaza aviya un atmosfer de anksiedad.
El sofer ke oyo ke Yagil fue arevatado, pishin se fue ande la famiya para darles las paras atras, las ke tomo por brodar el regalo. Su madre no kijo tomar las paras atras. Porke eya estava sigura ke su ijo iva tornar atras, sano i rezyo. Su korason le diziya ansina.
Sin peryer la esperansa, despues de diyas yenos de emosyon, se oyo ke los ke arevataron a las kriyaturas, van a ampesar a desharlos en partidas partidas. I una noche 53 diyas despues de la dezgrasya del 7 Oktubre, Yigal torno sano i rezyo a su famiya.
Keridos lektores. Este shifro “53” tiene una sinyifikasyon importante. Kuando avrimos el livro de Tehilim i meldamos el psalmo 53, kedamos kon la boka avyerta i el korason ampesa a batear fuerte. Aya eskrive: Mi yiten mitsion yeshuot Israel beshuv Eloim shevut amo, Yagil Yaakov yismah Israel. “Ke aviya si la salvasyon viniya de Sion a Israel! Kuando Eloim muestro Dio aga regresar a los kaptivos de su puevlo. Ke se alegre Yaakov i ke se alegre Israel”.
No es un mirakolo? Ke Yagil Yaakov torne al 53en diya a su kaza i entre los tehilimes ke melda el puevlo judio, el 53en Tehilim tenga estas linyas?
