Para no tokar a la ekstaziya ke resyenten los ke dan la alma por el raki, yo va intentar de kontar un poko sovre el vino i dar la alma por el vino. En bushkando de ande salyo el vino en las investigasyones agrikulturales, las uvas fueron enkontradas kaji 9000 anyos A.E.K.(antes de la era komun) En fosiles vyeron restos de las vinyas primitivas. Viktor Hugo aviya eskrito: ‘El Dyo kreyo la agua i los umanos el vino.’ La planta de la uva es el elemento esensyal i fue elaborada kon muncho karinyo, amor i atansyon.
El vino es un produkto natural i kultivado por el umano ama tuvo un atributo seleste. En la bibliya, Noah fue el primer ke se emborracho, dospues del Mabul, kuando las aguas se retiraron. El plantó uvas en su guerta, i de su produksyon de vino bevyo kantidades demazyadas ke lo emborracharon i esta leyenda se puede enkontrar en la mitolojiya.
7000 anyos antes de muestra era la planta de la uva ya fue produsida. Kon el tiempo estas plantasyones de las uvas abasharon verso el Mediteranyo, a Mezopotamya, i a Gresya. En los tekstos de los Hitites, eskrivyeron “Gestim” por los Sumeryos, “Oinos” por los Gregos i Vinus por el Vino. Komo por todos los aktos importantes, la uva i el vino tyenen un Dio en la mitolojiya Grega i es yamado Diyonisos. Bever el vino traye una sensasyon de libertad i los ke lo beven se sienten mas aktivos i aventureros. El kulto de Diyonisos salyo en la rejyon de Trakya. En la mar Egeo, azyendo eskavasyones serka de Çeşme, enkontraron kueshkos de uvas i esto también fue una deskuvierta importante sovre el vino i las koloniyas ke bivyeron en esta rejyon i sus dependensyas. Kon el vino, munchas vezes empleyaron trukos para ganar mas moneda. Una de estas frodas era de mesklar agua al vino. Ansi tenían mas vino para vender i arekojer mas paras. El vino gana otra dimensión kon las relijyones kristyanas de los monasteryos. Oy la famoza shampanya Dom Perignon i el ke dyo el nombre a esta bevida fue el ke topo las tapas ke no deshan entrar el ayre. I estos bokales se pueden guadrar munchos anyos, byen protejidas sin ke se danyen. El vino fue konservado en la edad medya en botas grandes de lenya espesyal. En la epoka Helenistika i Romana, muy probablemente, en Amforas. 2000 anyos antes muestra era, las amforas ya se konosiyan i tanbyen era la manera del tranporte del vino. Las amforas kon el tiempo fueron utilizadas por el trasporte de todo tipo de likidos. El vino es una bevida de las mas antiguas. Komo dize el dicho famoso “In vino veritas’’ La verdad esta en el vino’’.
Lehayim a todos.
