Arivimoz a Viena a las 9 de la noche. Mos tomaron kon shuttle para yevarmos al otel ke se yama "Europa Otel". Era en el sentro del sivdad, al lado de la kayye ke es tapado al trafiko ke se yama "Kartner strasse" ma estavamos kansados porke antes de vinir aki fuimos a otros 3 paizes. Por esto despues ke izimos chek-in al otel deshimos las validjas en la kamareta, salimos a la kaye ma estava muy yelado i tornimos al bar del otel para eskansar. Bevimos unas kozas i suvimos a la kamareta. Ala demanyana abashimos al restaurante para azer dezayuno; estava el bufe maraviyozo, solo mankava leche de pasharo. No izimos adjile porke teniyamos 2 diyas para konoser a Viena. En primero mos fuimos al buro turistiko para tomar enformasyones. Mos dieron buenas informasyones i mapas, i mos izyeron el program por 2 diyas. Empesimos a kaminar de la kaza Opera. Aryento estava la dekorasyon muy suntuozo i fasinante. De aya fuimos a unos kuantos palasyos i muzeos. Pasando del Helden Platz vimos los monumentos de Gothe, Mozart i Strauss. Despues vinimos a la eskola de ekitasion de Espanyoles. Delantre del palasyo aviya talikas; mos enbinimos i tomimos un tur kaji de una ora mos kamino en Viena. La talika muy shik, el faytondju kon bonjur i chapeo de silendro i avlandomoz en inglez para kontarmos los lugares ke estavamos pasando.
Despues del tur vinimos a la kaye ke se yama Kartner Strasse. A la fin de la kaye se topa el kuadrado ke se yama Stephan Platz i la katedral St. Stephan. Es muy grande i la arshitektura es Romanesk i Gotik. En tornando vinimos al otel i me eskansi un poko i me fui a la Sinagoga porke era noche de Shabat. Era la Sinagoga ashkenazi, izimos el arvit komo ke estavamos en la opera. Pasi la orasyon muy enteresante. Despues ke sali del arvit tomi a mi mujer kerida del otel i mos fuimos a komer ke topimoz en la kaye Kartner Strasse ke era restorante de pishkados. Mos izyeron muy buen servisyo i kedimos muy kontentes. Despues de komer mos fuimos a un cafe para komer las dulsuryas de Viena ke son espesiyal kon un cafe de Viena. Pasimos una nochada muy ermoza. Al otro diya salimos para kaminar a la kaye ke es muy konosida de parte de los turistos. Un poko merkar, un poko kaminar, un poko komer i ansi pasimos el tiempo i a la noche partimos a Estanbol. Kedimos muy kontentes de konoser esta sivdad; estavan las kayes limpyas, las personas shikes, alrededores muy enteresantes."Wir haben dich geliebt Viena".
Viajar es una pasion
