Savor es muy ondo byervo, aryento se guadra munchas kozas. A todos les parese ke savor es un byervo ke se kullaneya solo para las komidas. Ma no es este modo, tomar savor es komo una filozofiya de la vida. Es mirar a una kupa medya yena, medya vaziya. Si komites una komida ke no estava muy ermoza, ma si estas kon los amigos, el lugar si esta bueno, puedes tomar la savor.
U si estas kon los amigos i si ay una konversasyon ermoza, i ke no keres alevantarte, puedes tomar savor. Estas en un konserto, la nochada esta maraviya, las kantikas, los kantadores todo esta muy ermozo, puedes tomar savor. Kon los amigos salites a viyajar por 3-4 dias; si no miras muncho, si no sos puntozo, puedes tomar savor. Kuando tomas un regalo para tu mujer, u para un kerido, puedes tomar savor. Si partajas una koza kon tus entimos, puedes tomar savor.
En kavo, si tyenes amistad para la vida puedes tomar de todo savor, porke la vida es de si para si una savor grande. Por esto para gozar de la vida kale tomar de todo savor.
Komo dizen, si pensas muy ondo empesa a vinir la dolor.
Por esto mira de tomar de la vida muncha savor.
