Los ermanos de Binyamin, i partikularmente Yeuda, el grande de su padre, no se van a kontentar tan presto, kon esta grasya del podestador de Ejipto. Enpesan alora amostrar sus valor, i sus baraganiya i Yeuda sovre todo, se mete a konversar kon Yosef kon buenas i kon malas i le da a entender ke kale ke se yeve sano a Binyamin onde su padre.
Alora se konvensyo byen Yosef, ke sus ermanos verdadmente se van a entregar a la muerte por uno de eyos i ke esto demostra por siguro ke ya se tuvyeron repintido de lo ke izyeron kon el i no pudyendo mas suportar se dyo a konoser a sus ermanos, kon muncha fineza i se abrasaron i yoraron de parte a parte. Al punto tuvo Paro avizo de esto i los grandes del palasyo i se gustaron muncho de saver ke sus podestador i rijidor es de una famiya la mas onorada en akel mundo, i no es un ombre perdido o esklavo sigun pensavan fin agora.
Yosef les dyo regalos i dadires a todos sus ermanos, para toda la famiya i kon orden de Paro mando a sus ermanos kon karosas del palasyo onde Yaakov, su padre por azerlo vinir a Mistrayim, para ke biva el resto de sus dias kon repozo al lado de su ijo kerido.
Los ermanos de Yosef no pedrieron tyempo i se fueron todos, yenos de alegriya i gozo onde Yaakov sus padre i sigun les enkomendo Yosef se rijeron de no darle avizo a Yaakov al punto del echo de Yosef.
Yaakov no kijo kreer tan presto sus palavras ni las palavras de sus ijos. Pero, vyendo las karosas i los regalos ke es verdad lo ke dizen i se arebivyo su korason i kavro fuersa i alegriya. Todos los moradores de Kenaan ke savian la ansya de Yaakov, se alegraron de sintir esta buena nuvela. I les izo konbite tres diyas.
