El silensyo es djusto de diskutir, konfrontar, aklarar el propyo pensamyento, para enkontrar un punto komun kon el de enfrente.
El problem sale kuando, al lugar de una repuesta ke estamos asperando, obtenemos “el silensyo absoluto”.
Elia Kaneti disho: “Ay algunos ke en silensyo alkansan su maksima maldad”.
El uzo del silensyo es una arma reel, invisible para evitar la konfrontasyon direkta del de enfrente. Todos tenemos derecho a no responder a una pregunta, kuando la aplikasyon reprezenta una koza emportante.
“Administrar el silensyo es mas difisil ke de administrar el diskorso” disho el jurnalisto, Georges Clemenceau.
Definitivamente el silensyo puede dizir muncho, sin dizir nada, ma el silensyo es el ruido el mas fuerte ke egziste.
El uzo del silensyo es abuzo porke;
Deshar de avlar kon ken ke seyga, es una forma de atako.
Es emportante de diferensyar entre el silensyo ke es el dezeo de no diskutir mas, para no arravyarse, i el silensyo ke se utiliza komo arma para kastigar al otro.
La persona ke kere kastigar al de enfrente sin kitar palavras malas de la boka, no responde. Su silensyo es su repuesta por munchas razones.
Ke es el poder del silensyo?
El poder del silensyo sera bueno i pozitivo para uno, i malo i negativo para otro. Depende de munchos faktores personales i sosyales. Ay momentos i situasyones en la vida ke el silensyo es nesesaryo i apresyado. Se puede dizir ke el silensyo es trankilidad de la persona. A vezes alesharse en silensyo puede ser pozitivo para no provokar un problem.
El silensyo es muy poderoso komo una mirada, una palavra o un djesto, kuando se aze en el momento, en el lugar i en la manera apropriada.
El silensyo verdadero es, el ke esta aryento de mozotros i mos da kalmo i pas.
Para poder oyir el silensyo verdadero, en primero devemos de enrikeser los espasyos de la soledad, komo gizar komidas, alimpyar la kaza, djugar, durmir i otras kozas para enbevesermos.
Unas kuantas dichas sovre el “Silensyo”.
