Ne esto bivyendo en Israel. No se si tengo el derecho de avlar i dar mi opinion sovre ka Gerra de Gaza. Ma reelmente mos esto dando muncha pena de oyer tanta djente ke se estan muryendo. Israelyanos i Palestinyanos. Es djusto ke estan en gerra. Ma esto no es la razon de la muerte de personas ke no son militarios.
El evenimyento el mas trajiko fue la muerte de los tres esklavos ke reusheron a fuir de la mano de los militanes del Hamas. Kuando alkansaron a vinir serka de Israel kon la bandiera blanka, malorozamente los soldados Israelyanos tiraron sovre eyos. I los dos fueron matados. I los Israelyanos entendyeron ke izyeron un yerro. I dyeron el orden de no emplear las armas. Ma kuando el treser ke reusho a salvarse, kuando salio del lugar ande se eskondyo fue matado por un soldado ke tiro malgrado ke no era permetido. Malorozamente i el mos desho la vida. No se komo reusheron a salvarsen de los militanos del Hamas. Ma kuando no tenesh la probabilidad de bivir mizmo en este kavzo la muerte esta detras de las personas.
Desparte de esto estamos oyendo ke siertos esklavos fueron topados muertos. No savemos mizmo komo fueron matados. Puedeser kon las bombas Israelyanas, puedeser por los militanes del Hamas.
Kreo ke mizmo los Israelyanos ke keren la gerra agora estan demandando de dar un enterval para pueder salvar las almas ke estan en las manos de los militanes.
Ke no vos pareska ke estan en una buena situasion. Kuando liberaron los primeros esklavos, les dyeron syertos kuras para ke esten kon karas rientes. Ke desgrasia.
Ay serka de dos mezes i medyo ke miles i dyes miles de personas se estan muryendo en esta gerra.
Oy en una gazeta turka estava eskrito ke syertas firmas Israelyanas keren azer villas en el bodre de la mar en Gazza. Un amigo me konto oy, ke ay mizmo syertas personas ke biven en Estanbol ke estan merkando kampos en Gaza a un presyo muy basho. I esto es una otra dezgrasia en este siglo.
Espero ver la pas en poko tyempo.
