“Akompanyar la muzika kon el bolar es muy bueno para la salud mental”.
La noche pasada avri la televizyon; en el kanal fransez Mezzo, avia una orkestra filarmonika dirijada por Daniel Harding. La manera de estar en la shena i su manera de dirijar la orkestra me empresyono. Asta akel momento no tenia dinguna idea ken era este maestro. Entri al “google” para ver ken es este ombre enerjetiko. Kuando meldi su biyografia, entendi ke es una persona kon una enerjia diferente.
Harding nasio en Oxford, Inglatierra, en ogusto 1975, i estudio la trompeta. Kuando vino a la edad 17, fundio un grupo de muzisienes mansevos, ke fueron konosidos komo parte de la Orkestra Joven de la Union Europea. Harding desidio de embiyar un teyp de sus performansas al grande shefe de orkestra Ingles, Simon Rattle, ke fue enkantado de lo ke oyo. Le propozo immediatamente de ser su asistente por un anyo. Torno a la Universitad de Cambridge, ma otro konduktor, Claudio Abbado, lo izo su asistente en la Orkestra Filarmonika de Berlin i asi su vida empeso a trokar. Todas las orkestras famozas le estavan propozando de ser sus konduktores. Harding, es el direktor muzikal de la Orkestra de Paris i de la Orkestra Sinfonika de la Radio Sueca. En 2017, fue nombrado por el governo fransez “Officier de l’Ordre des Arts et des Lettres”.
Este ombre injeniozo desidio ke aparte la muzika deve de tener otro ofisio para perfeksyonarse en la vida i empeso a tomar kursos de aviasion. Se izo pilot ofisial en Air France. “El direktor i el piloto son lavoradores paresidos. Das la espalda al publiko i la djente kreen ke tu no azes nada”. Harding pensa ke kuando es konduktor la responsabilidad esta enteramente en su espalda, ma kuando es pilot la responsabilidad esta dividido i dize ke esta diferensia le traye ekilibro en la vida.
