Ya se ke semos un semanaryo Djudio, ma el kalendaryo ke estamos empleando i bivyendo i el empesijo del muevo anyo es emportamte por muestra vida. Es emportante porke tenemos muevas esperansas kon el empesijo del muevo anyo. Dospues ke pasimos 2-3 anyos kon la epidemia del Covid, el anyo pasado el rash ke bivio la Turkiya fue una desgrasia. No savemos mizmo el nombre de personas ke se murieron. Egzaktamente no se save si son sesenta mil o ochenta mil. Las kazas ke se devian de azersen, malorozamente no se izyeron dainda. Malorozamente esta rejion de 7-8 sivdades va tornar al normal a lo manko en dos o tres anyos.
Este anyo el mas grande problem para mozotros los Turkos fue los problemes ekonomikos i lo ke estamos bivyendo kon la pujita de los presyos. Vemos ke alkilar una kaza no es muy kolay oy en diya. Los presyos se izyeron 3-4 vezes mas karo. El ke pagava 7-8 mil liras oy en diya deve de pagar entre 20 i 25 mil oy en diya. Reelmente una desgrasya i un grande malor. Esperamos ke esta situasion se va ameliorar en el 2024.
Verso la fin del anyo, dospues ke Israel bivyo una desgrasia el 7 de Octobre; una gerra empeso en el Medio Oriente entre Israel i el Hamas. La desgrasia ke se bivio malorozamente no se va olvidar anyos i anyos. Oy ay serka de 80 diyas ke los Israelyanos estan echando bombas a Gaza. I malorozamente munchos soldados Israelyanos toparon la muerte. Reelmente no kero mizmo dizir la kuantitad. I ay mas de 20.000 muertos en Gaza i un alay de esklavos Israelyanos en las manos de los militanes del Hamas. Espero ke esta situasion va topar fin en poko tyempo.
Kon todas estas desgrasyas i la ekonomiya esta reelmente problematika en muestro payis. Ya savemos ke ay problemes en los payizes de la Evropa. Ma un poko mas en muestro payis.
Dishimos ke era la fin del Covid. Ma los diyas dalkavo vemos mas munchas personas kon la karatula. No se mizmo si devemos dar a los lavorantes karatulas en muestra fabrika.
Oyemos en la radio ke ay solo en un ospital (en Estanbol) kada diya mas de dos mil personas ke vienen urdjente. Este invyerno van a ser muy difisil las kondisyones de vida.
Eskapando este anyo i mi artikolo vos auguro una anyada kon salud i kon echos buenos i pas en muestro payis i en el mundo entero.
