KOMANDANTE JUDIO DE LA ARMADA RUSA, EN LA 2. GERRA MUNDIAL
La segunda gerra mundial, ke duro 6 anyos (1939-1945) fue el dezastro el mas sanglante de la istoria de la umanidad. La gerra empeso kon la envazion de la Polonya i la Rusia (URSS), por la parte de Alemanya, en el 1 septiembre de 1939. A la fin de la gerra, la Rusia, la China i la Alemanya fueron los paizes ke perdieron una grande parte de sus populasiones. Los investigadores pensan ke, serka de 100 miliones de siviles i militares murieron durante esta gerra. Ma la persekusion sistematika de los Nazis enverso los Judios, es un egzemplo ke no egzistio en la istoria del mundo i entre 6-7 miliones de judios perieron sus vidas komo no se tiene visto.
La noche pasado estavamos mirando la seria de la segunda gerra mundial en Netflix. Verso la fin de la seria, mos estavan amostrando la armada rusa ke estava liberando los judios de los kampos de konsentrasion. Tenian un komandante ke se yamava Leonid Rosenberg. Pensando ke es judio, empesi a bushkar enformasion sovre el. Rosenberg nasio en Ukranya en 1921, termino el lise en 1939, i se fue a la 1. Skola de Artilleria en Kiev. Termino la eskola komo komandante (lieutenant) i desde el primer dia, partisipo a la gerra kon este titolo. Durante la gerra, enkontro a su padre ke era kapitan de las bombas i se ambezo ke su madre, su ermana i su ermano fueron matados por los Nazis. Despues ke los Rusos entraron a Alemanya i salvaron a los Judios, Rosenberg, durante 26 anyos, estuvo en la armada rusa komo “lieutenant colonel”, ma nunka no pudo tener un grado mas alto porke era Judio. El disho ke devia de estar fuerte para segir su vida i rezistir a la brutalidad de los Nazis i al antisemitizmo. En 1991, se desidio de instalarse kon su famiya a los Estados Unidos. Ayi se izo miembro de una organizasion, “World War II Invalids & Veterans” i disho ke 500.000 Judios gerreyaron en la armada rusa i 200.000 fueron matados o kaptivados por los Nazis.
La 2. gerra mundial se pudo terminar grasiaa a la aliansa de los Amerikanos, Inglezes i Rusos. Para reushir a ganar la gerra, Churchill disho, “no puedo ofreser otra koza mas ke sangre, esfuerso, sudor i lagrimas. Tenemos delantre munchos, munchos mezes de lucha i sufrimiento. Devemos de ganar la gerra por tierra, mar i aire”. I asi fue.
