Esto viendo, kuando estan pasando los anyos, kale ke tengan las personas unos kuantos Hobis. A lo manko uno deyo. Esto puede ser travar fotos, arekojer objetos, lavorar en las ovras diferentes, komo esto ay munchas kozas ke se pueden azer. Este modo de hobis a las personas estan mantenyendo mas mansevos. Por egzempiyo, las mujeres se pueden ir a los kursos ke ay en los sentros kulturales del kazal komo trikotaj, grupos de muzikas, teatros, gizar komidas ets. Kuando azes este modo de aktividades sales afuera, kuando sales afuera, te vistes, te arapas, las mujeres se azen makiyaj, i ansi te syentes mas orozo i bueno. Dizeremos kuando salgo a Bagdat caddesi absolutamente kada vez entro a las libreriyas. Miro ke livros salyeron muevos. En la parte de muzika karishtereyo los CD i miro si ay muevos albumes? Paso a la vanda de hobis; aya miro a los Puzzles ke se namora mi mujer de azer, si vino muevos artikolos. Agora ay estas libreriyas aryento de kafes. Tomo un kafe i al lado unos kuantos livros, en bevyendo el kafe karishtereyo los livros, i si me gusta lo merko. Kuando salimos a los viyajes mos vamos a los muzeos, a las katedrales, i komo esto munchos lugares. En Estanbol ke maraviyozos de muzeos ke tenemos. Despues de 65 anyos, estos muzeos son sin paras, debaldes. Las meshkitas son unas maraviyas de arshitektura. Komo Süleymaniye ke lo izo Mimar Sinan. Komo estos ay munchos. Solo en la kaye de İstiklal en kaminando ay 4 iglesyas. Kuando mos vamos a la Evropa, no peryemos tiempo para irmos a las katedrales, en Estanbol no mos vamos ni a una. Ay ke dizen algunos no es de djusto entrar a la iglesia. Yo kuando me vo no me vo porke ke es iglesia. Me vo komo muzeo, para ver la arshitektura i los vitrayes, ets. Vos kontare unas kuantas otras aktividades para azer. Kada vez digo, "En Estanbol estamos biviyendo ma el Estanbol no estamos bivyendo". Por egzempyo, ke karar ke se engrandesyo la sivdad. Konosesh los sentros muevos? Despues de los 65, i los otobuses i los metros i vapores son debaldes. Suvivos a un otobus ke se va a un sentro ke no konosesh, meté a la oreja la muzika ke vos plaze del telefono en viendo las kayes los lugares ke pasash i a la djente mirando. Vini fina la fin del durak ke se va el otobus. Abashá aya, kaminá un poko por aki por aya, konosé al sentro ande vinitesh muevo. Despues de unas kuantas orikas, de muevo torná. Vash a ver ke vash a tomar muncho keyf de konoser lugares muevos. Vitesh ke ay de azer munchas kozas. En primero kale ke kerash. Si no tyenes hobis en la vida, bives komo las yervas aryento de un saksi.
