La Fondasion Shoah empeso un proyekto para dokumentar la “barbaria indeskriptivle” del 7 de oktubre. Asta oy, se arekojo 130 entrevistas de los ke se salvaron del masakro de Hamas.
El fondador, Steven Spielberg esta konyorando: Una vez otra, el antisemitizmo esta en piez kon orgolyo”.
La Fondasion USC Shoah, fondada por el direktor, Steven Spielberg, empeso a rekopyar los testimonios (en los videos) de las atrosidades kometidas por los teroristos de Hamas kontra los israelianos el 7 de oktobre. Spielberg no esta direktamente inkluzo en este esfuerzo, ma esta dando apoyo en favor.
"Nunka en mi vida, me imajinava ke iva ver una barbaridad tan indeskriptivle kontra los judios", disho Spielberg ke poseda la koleksion de videos la mas grande del mundo, de testimonios de los sovrebiventes del Olokosto.
En sus deklarasiones a Fox News, Spielberg ekspreso el shok ke bivio viendo la violensia de los teroristos de Hamas kontra los israelianos, i el antisemitizmo en el mundo entero en los ultimos dos mezes. "El antisemitizmo siempre estava aya. O estava un poko afuera de vista, eskondiendose, o estava mas avierto, komo Alemanya en los anyos 30”, disho Spielberg. “Ma desde Alemanya en los anyos 30 fin oy, no fui shaet a un antisemitizmo asemejante, tan orgolyozo, kon las manos en el bel, komo Hitler i Mussolini”.
La organizasion kon el sentro en los Estados Unidos, esta kolaborando agora kon ekipos de produksion en Israel para arekojer testimonyos de los masakros del 7 de oktobre, kuando unos 3.000 teroristos entraron a Israel por tierra, aire i mar, matando a 1.200 personas, la majorita de eyos, siendo siviles asasinados kon brutales atrosidades, i tomando mas de 240 rehenes.
En un artíkolo publikado en novembre anonsando la preparasion del dokumento, la fondasion eskrivio el testimonio de Shaylee Atary Winner, ke se fuyo de su kaza en el Kibbutz Kfar Aza kon su bebe de kuatro semanas, la demanyana de 7 de oktobre. Su marido, Yahav Winner fue asasinado por los teroristos mientres ayudandoles a fuyirsen.
El testimonio de Atary Winner es una de las 130 entrevistas arekojidas asta agora komo parte de testimonyos de los sovrebivientes del 7 de oktobre. El publiko los va topar en el internet a traves el Archivo de Istoria Visual de la fondasion en la Koleksion Kontra el Antisemitizmo a traves Testimonios (CATT) de la Fondasion Shoah.
Spielberg, ke fondo la organizasion en 1994, kree ke el esfuerso va garantizar ke las bozes de los sovrebivientes va mobilizar komo un instrumento poderozo, i va detener el peligrozo ogmento del antisemitizmo i el odio.
"Las entrevistas kon los sovrebivientes de los atakes del 7 de oktobre i la enrejistrasion de los testimonyos van a komplir muestra promesa a los sovrebivientes: sus istorias van a ser rejistradas i kompartidas para prezervar la istoria i para kreer un mundo sin antisemitizmo i odio de kualker tipo”, disho Spielberg.
