Eti Koen
En mi chikez i mezmo en mi primera manseves, no se uzava muncho ir afuera para selebrar el anyo muevo. La majoridad de la djente se arrekojiyan en una kaza kon sus grupos de amigos/as i sus ijos/as. De muncho tyempo antes ya se ampesava a avlar. En jeneral los ke tenian salones anchos arresiviyan.
Las mujeres aziyan planos de lo ke se iva aparejar para la meza:
- Estrea, tu azemos un börek ermozo i una salata de apyo.
- Fani, tu mos puedes azer kyoftes de prasa?
- Siguro ke puedo. Aparejare i otra una koza. Kualo keresh? Vos azere una salade russe?
- Maraviya!
- Perla hanum, mos pudes azer una fritada de espinaka? I si no es difisil una tarama?
- Siguro.
- Klara a ti te kayo de azer yalandji dolmas de yaprakitos i de kol.
- Viktorya tu azemos una aluenga.
- Ijas ke dizish; kozeremos gaynas o indiana?
- Por siguro indiana!...
- Suzan save aparejar muy bien la indiana. Ayde Suzan este echo es para ti.
- Matilda puedes azer bizelyas i ich pilav kon kastanyas?
- Si, si!
- Zelda a ti te kayo de azermos savor de boka. Tu azemos un malebi i una halva de semola ke la azes muy savroza.
Este modo se despartiyan los aparejos. No le davan muncha pena a la balabaya para aparejar. Eya aparejava solo la salata.
Los ombres tenian otro dover; eyos se ivan al Balikpazari para merkar kezos, lakerda, likorino, jambon ets... i fruta.
Aparte de esto se merkava kotiyones i regalos muy simples para la loteria ke se aziya.
Despues ke ya penaron tanto, estas sinyoras, el 31 desembre, se ivan al kuafor, aya asperavan oras i oras para ke les venga la sira, i enfin, bien kuafadas, se vistiyan shik shik para la noche. Los ombres viniyan mas demprano de sus echos, i eyos tambien se vistiyan shik, kon kostum i kravata.
I es kon muncha alegria ke se arrekojian maridos, mujeres, ijos, ijas, i se egleneava noche entera. Se kantava, se baylava, se kontava anekdotes i konsejikas i se reia kon toda la alma.
En estos dias difisiles ke estamos bivyendo, esperaremos de ganar de muevo el spirito de la alegria...
Vos sueto un anyo yeno de salud, prosperidad, paz en el mundo entero i muncha alegria.
