Hanuka ampesa kon alegriya en Kislev i eskapa en los primeros diyas de Tevet ke es sigun de la Tora el 10en mez en ampesando de Nisan. Tevet es un tyempo ande no ay dinguna fiesta en muestro kalendaryo i ke komporta evenimyentos tristes de muestra istorya. Mos akodraremos del Galut de Babel i del empesijo de esta trajediya en el anyo 583 A. J. La armada del Rey de Babel de Nabukadnezar aviya asyejado Yerushalayim i 3 anyos despues en 586, destruyo enteramente las paredes de muestro Bet Amigdash i yevando a su populasion al Galut a Babel. Galut ke turo 70 anyos kon todas las trajediyas ke paso en su tyempo. El 10 Tevet (Asara ve Tevet) ke es konsiderado komo el empesijo de la destruksion de muestro patrimonyo nasional es konsiderado komo un diya de dolyo, de tanid i de tristeza por muestro puevlo ke komemora de anyo en anyo en su tyerra komo en la diaspora. Antes mas 60 anyos, el Grande Rabinato de Israel dekreto diya de Kadish el 10 Tevet por la destruksion de muestro Reynado i komo rekordo de la Shoa ande milyones de muestros ermanos desaparesyeron sin ke se sepa kuando i ande muryeron, dunke el 10 Tevet es diya de Kadish Jeneral para todo muestro puevlo. Tevet komo kada mez de muestro kalendaryo sigun el livro mistiko, Sefer a Yetsira es atado a un Trivyo de Israel en un sensyo spiritual i a un sinyo de zodiak Kaprikornio es atado al Trivyo de Dan, ijo de Yaakov i de la konkubina de Rahel Bilha. En su bendision, Yaakov trasa el kamino del destino de kada uno de sus ijos, por Dan dize ansi: "Dan va ser una kulevra ke morye al kavayo en el kamino a su karkanyal i echa abasho, Sinyor Dyo me abrigo en tu piadad". Ma en la fin de la Tora en la Perasha Zot Aberaha Moshe Rabenu mos prezenta una otra facha de Dan diferente de la bendision de Yaakov: "Dan es el elan vital de la nasion ke produizo Shimshon en muestra istorya; Dan es la fuersa unika demenesteroza de la nasion. El Trivyo odasiozo a ken se demanda ayudas en oras de apreto". Las profesiyas topan su sensyo en la spiritualidad del sinyo de su Trivyo ke es la birra ma una birra kontra la endjustiya, la opresion i la krueldad, una birra pozitiva ke ayuda, ke enderecha, ke salva situasyones apretadas ma da tambien lugar a aktos de violensa. Daremos egzemplio istoriko de la birra de este Trivyo i kontaremos… El ijo regalado de Dan, Uris era sodro i en los funerayes de Yaakov ke se estava yevando de Ayifto a la Maara de Mahpela para ser enterrado en este lugar Santo, vino Esav, ermano aedado i djumelo de Yaakov ke konosemos por su maldad i deklarando ke este lugar es suyo i fueron ovligados de mandar emisaryos a Naftali para tomar el kontrato ke estava guadrado en Ayifto. Uris en viendo ke se esta tadrando de meter en tierra a su nono, kitando su espada korto la kavesa de Esav enpleyando negativamente su birra. Tevet, mez eskuro, puede ser ma la natura mostra siempre su kara ermoza al kamino a la luz i a la esperansa. En Israel, vemos vinir miles de pasharos sovre todo sigonyas bolando verso la tierra bendicha de la medina para pasar una invyernada ermoza kayente. El anyo pasado, arivo a Israel 25.000 sigonyas ke son komo una promesa de la primavera serkana, un mesaje de esperansa para aklararmos en estos diyas oskuros ande asperamos la PAS i AMOR para el mundo entero.
