Esto eskrivyendo mi artikolo el primer diya del anyo. I komo esto desrepozado (un covid livyano - solo abashada) tuve la posibilidad de mirar la TV i las enformasyones de diferentes payizes.
El anyo 2023 fue una desgrasia para la ekonomia turka. Vemos ke la lira turka pedrio 55% kontra el dolar amerikano. I las mezadas pujaron de 100 %. Es la mizma koza por todo modo de komidas (karne, kezo, produktos de leche - kezos, guevos; zarzavates; frutas; bevyendas sin alkol i kon alkol… Todo modo de kozas para komer. Reelmente una desgrasia. Todo pujo a lo manko dos vezes.
Vemos la misma koza para todo ke se deve de azer en una kaza para mantenerla. Es la misma koza para las konstruksyones i reparasiones para todo modo de edifisios i de kazas.
Es kreo por la primera vez ke esto eskrivyendo un artikolo asemejante.
Para alkilar una kaza esta una desgrasia. Las kazas ke se alkilavan a 6-7.000 liras estan para 20.000 a lo manko. I en muestra komunidad, ay djente ke estan trokando de kuartier, mizmo personas ke estan trokando de sivdad. Esta una desgrasia.
En la televizyon en un program se estava avlando de la Argentina i de Venezuela ke estan mas mal de muestro payiz. No se reelmente lo ke estan azyendo en estos payises; ma ay unos kuantos mezes dospues de las eleksyones ke el ministro del trezoro, i la prezidente de la banka sentral son personas konosidas en el mundo finansal i tyenen planos ke keren realizar. Dospues del mez de mayo vamos a ver si reusheron. Si no guay!!
Oy las bankas estan pagando 50% de entereso para todo modo de paras turkas. Esperamos ke esto va abashar a 30% verso la fin del muevo anyo.
Reelmente es difisil de estar en una situasion asemejante. En el komerso mizmo si no ganash, devesh de pagar dasyo. El dasyo de la enflasyon.
Bivir i ver.
