Aldo Sevi
En muestros primeros anyos en Israel kaji no avía Shabad ke mos kedávamos en kaza.
En enverano mos ívamos a la plaj de Mihmoret. Esto era para trokar un poko, ke en los días de la semana entrávamos a la mar en la plaj de Natanya, 5 minutos a pie de muestro apartamento. A vezes, al lugar de la mar ívamos a la pisina "Miramar", tambien en Mihmoret, ke a mi me plazía muncho porké su nombre era en Espanyol... En esta pisina, en la primera mitad de los anyos 70s se puedía oyir muncho turko mesklado kon ebreo i espanyol. Me akodro una vez oyimos una mujer gritando: "Tiré tiré, mosmor oldu behayay!" (Mira, mira, ya se izo kompletamente violeta). Toda la famiya mos pishimos de la riza, sin saver ke dos-tres anyos después mozotros también ívamos a avlar en esta manera...
Akeyos anyos no avía en los otomobiles érkondishen (una palavra ke munchos de los muestros pronunsían komo el-ken-disho…). El retorno de Mihmoret lo akodro komo una vera sufriensa. El aver ariento del otomobil estava de atabafar, i la siya me kemava la espalda, el popó i mis piernas por detrás. Asta ke suvíamos a la otostrada i el ayre ke entrava de las ventanas ampesava a arefreskarme un poko, no pudía respirar.
Las demi-sezones eran los tiempos de piknik en la kampanya. Piknikes en lugares komo En-Harod, Aqua Bella, Sahne i lo mas en Ramat a-Nadiv, ke en muestro jargón de famiya se yamava "La guerta de Rothschild", achakes ke en este parko se topa la tomba del Baron Edmond de Rothschild. El piknik lo azíamos en una arvolería afuera del park, i después de komer mos ívamos a dar un paseo en el parko, ke en la primavera i en el otonyo era yeno de rozas en diferentes kolores i golores.
No salíamos al kamino solos. Kaji siempre era kon las famiyas de la tant Suzi i su ermano Yusef. A vezes vinía la famiya Lodrig (otros primos de mi madre) de Tel-Sur o la famiya Yohay, Gelibolulús ke moravan en muestra kaleja, i tenían una sharkuterí afuera del charshí de Natanya.
Estos piknikes no eran piknikes de mangal - nunka asávamos karne. Trayíamos kon mozotros komidas ke se pueden komer yeladas, komo keftikas de prasa, guevos haminados, yaprakes, almodrote, chalí, piyaz, sudjukes i muncha fruta.
Ay anyos i panyos ke no salgo a piknikes. Kuando morávamos en Estambol, el pasatiempo de fin de semana (Shabad i Alhad) era ir a komer afuera: un día a un restorante de pishkado en el Bosfor, al otro día, a un restorante de karne. Aínda m'akodro de muestro restorante favorito, Ömür. Ayá tengo komido por la primera vez shnitsel vienez, una komida ke no era muy konosida akel tiempo en la Turkía. En esto, mis fines de semana oy en Israel paresen mas a los de mis parientes en Estambol antes ke vinimos akí. Mis parientes, en viniendo a Israel, fueron ovligados de abashar sus nivel de vida. En los anyos 70s no avían munchos restorantes buenos en Israel i los pokos ke avían - eran muy karos. La kultura de salir a komer afuera (mas ke un falafel o döner) ampesó akí en los anyos 80s, kuando el sistem ekonómiko del país ampeso a trokarse al kapitalizmo.
