El anyo 2023 fue el mas negro anyo kalendario para el puevlo judio desde el Olokosto. Fue un anyo en el kual los judios lucharon aryento del paiz asta ke muestros enemigos mos akodraron ke no tenemos otra opsion ke de ser unidos. Fue un anyo en el kual los lideres judios fueron sorprendidos de los rezultados dezastrosos. Fue un anyo en el kual Hamas, komo los antisemitos en el mundo entero, revelaron el antisemitizmo kon orgolyo i sin verguensa.
Agora ke este anyo se esta eskapando, i estamos entrando en un anyo muevo, estamos rogando ke este anyo seyga muncho mijor para Israel i el puevlo judio.
Ay esperansa? "Todos puedemos krear esperansa”. Un muevo anyo, un muevo empesijo. Es difísil de sintirse feliz i pozitivo kuando ay una gerra en munchas partes del paiz. Kada dia estamos viendo fotos de muestros presiozos soldados ke se estan muriendo en la gerra, fotos de los ke son tomados komo rehenes, fotos de los ke estan gerreyando. El mundo entero en este paiz konose djente ke fueron asasinados el 7 de oktubre o durante la gerra.
Ma ay esperansa, definitivamente ay esperansa. La esperansa esta en lo ke krees, en lo ke konstruyes. Mezmo en estos dias oskuros, puedemos krear esperansa. Lo devemos a los soldados ke estan gerreyando por mozotros i por muestro paiz. Lo devemos a los rehenes i lo devemos a los ke estan dando sus vida en esta gerra. En ebreo, “esperansa” o ‘’tikva’’ es el imno nasional. Es la kreensia sentral del puevlo judio. Esperansa sinyifika ke muestro senso, muestra vida kolektiva, muestra istoria, tiene un buto. En otras palavras, tenemos una mision. Agora mizmo, muestra mision es eliminar Hamas. Tambien tenemos la mision de ser la kara de Dio en este mundo, de ser luz para las nasiones. Agora mos esta vinyendo ridikulo, agora ke el antisemitizmo esta en todas las partes. Ma la esperansa esta en muestro alrededor, en todo lugar ke miramos. Esperansa, sovre todo, esta en el puevlo judio.
Estamos viendo esperansa en los soldados, por eyos lo mas emportante es gerreyar por lo ke kreen, protejar sus kazas i famiyas, protejar las kazas i las famiyas de los israelianos.
Estamos viendo esperansa en las madres de los soldados. Munchas se estan manteniendo okupadas. Munchas no estan puediendo durmir, estan tomando trankilizantes. Ma estan topando kaminos para adelantar sin azer yerros, sin kayer.
Estamos viendo esperansa en las mujeres de los soldados, ke solas se estan okupando de la famiya: estan lavorando, gizando, empleyando i topando remedios para mantener felizes a sus ijos mientres ke sus maridos estan en la armada.
Estamos viendo esperansa en los ke tienen fe i ke estan viendo la mano de Dio, i en todas las personas ke estan rogando por Israel.
Miles de personas ke estan lavorando komo voluntarios en granjas o lavorando para ayudar a los soldados, o ke estan dando moneda a los sovrebivientes de Nova para sanarlos. Las terapistas estan penando kada dia para sanar las personas kon travmas. Los doktores estan penando para sanar los ferridos. Estas todas personas estan lavorando kon esperansa.
Mos estamos uniendo para kudiarmos unos a los otros i protejar muestro paiz. No semos ni relijiozos, ni no-relijiozos. Semos israelianos. Semos judios. El Dio mos prometio esta tierra i el Dio no mos va abandonar. Esta es muestra mas grande esperansa. Semos parte de una istoria kon un buto i no vamos a ser vensidos.
