Despues ke estuvyeron Moshe i Aaron konversando kon el puevlo de Yisrael i les dyeron a saver la desizyon del Dyo poderozo, fueron al palasyo de Paro por avizarle el komando del Todo Poderozo.
En akeyos tyempos, no era fasil a kualunke persona de entrar i toparse kon Paro sin ser otorizado. Pero, Moshe Rabenu sirvyendose de su vara ke le apronto el Kriyador en el monte de Horev para ke aga kon eya todos los sinyales i maraviyas, entro al palasyo sin lesensya de ninguno, i topandosen Moshe i Aaron en prezensya de Paro, le avizan el komando del Dyo ke salve a su puevlo Yisrael del esklavaje i ke los mande alforiya. Paro no tomo tan presto en konsiderasyon estas palavras de Moshe i Aaron. Les dize ke los djudyos estan muy floshos en sus lavoros, i por esto, ya les metera un buen yugo ke no tengan tyempo de pensar en la salidura de Ayifto.
Paro izo apezgar el yugo de su servisyo sovre el puevlo djudyo kon una krueldad ke no se puede imajinar.
En el enterval de un anyo, mando el Dyo dyez yagas, una mas fuerte ke otra a Mistrayim. En primero se trokaron las aguas del Nilos en sangre, i muryeron los peshkados del riyo despues. Se muchiguaron en el rio las ranas i salyendo despues de la agua, kavzaron munchos danyos en la tyerra. Despues le konkriyo en todo el Ejipto unos piojos de una manera muy feya i muy danyoza. Mas despues arivo al Ejipto una mesklatina de unos animales krueles ke kevrantaron muncho el publiko.
Despues uvo una mortaldad terrivle en las kuatropeas ke izo muncho danyo, una feya i muy negra sarna les vino a todos los ejipsyanos asta no pueder suportar. Despues uvo en buen pedrisko ke danyo todos los frutos del kampo.
