A la fin el anyo 2023 se termino kon munchas dolores, peryitas de mansevos, aedados, hazinuras, karestiya de vida a no pueder merkar kezo, karne, gayina, fruta i munchas otras kozas, mansevos sin topar echo, i munchas otras kozas…
Seya komo seya, siguramente ke estamos dezeando la byenvenida del anyo 2024. Estamos esperando ke, vamos a bivir en un mundo sin gerra, kon repozo i felisita.
El dia del anyo muevo es un festival ke se selebra en todas las partes del mundo, el primer dia del anyo, 1 de Enero en el kalendaryo moderno. Esta data reprezenta el prinsipyo de un anyo muevo, despues de una perioda de rekuerdo del anyo pasado.
La orkestra filarmonika de “Vienna”, realiza tradisyonalmente un konserto de Anyo Muevo, en la demanyana del dia del “Anyo Muevo".
La selebrasyon del anyo muevo es una tradisyon en las kuatro partes del mundo. Las komidas, los fuegos artifisyales i la reunyon kon amigos i famiya son elementos komunes en la mayoria de las relijyones i kulturas.
Las 10 Tradisyones de anyo muevo ke traeran la Shans son:
Lo ke asperamos del anyo muevo 2024, es tener un anyo yeno de sanedad, felisita, de repozo, kon pas en el mundo entero.
uno de sus prensipales uzos en esta data, es de arrondjar los platos kontra las puertas para ke se dezazgan. La kreensya de este uzo es, ke destruir los platos aleshan la alma mala i trae la buena shans a la kaza i a los ke moran aya. Los platos se akumulan delantre la puerta de sus kazas, el ke akumula la mas grande kantita de platos rotos, tendra el mijor anyo muevo.
La razon de eskojer las lentejas , no es la savor de las lentejas. La forma redonda de los alimentos es el senso de abondansa, azlaha i prosperidad. Esto es una shans para el anyo ke vyene. Munchas lentejas, muncha abondansa en el anyo muevo.
Es un ritual perfekto para los ke viajan muncho en el dorredor del mundo. Esta tradisyon es valable en munchos paizes komo Peru, Uruguay… Esto asigura un anyo yeno de viajes en todas las partes del mundo entero.
Es una tradisyon muy vyeja ke se aze en la ora de la kumida de la noche. En los primeros segundos del anyo muevo se kome 12 uvas, una por kada mez del anyo, para yamar a la shans ke venga.
Esta tradisyon konsiste en enkolgar una sevoya en la puerta de kada kaza en el anyo muevo. La verdura semboliza el renasimyento de un anyo muevo ke va empesar.
En Rusia el anyo muevo se resive kon las personas medyas dezmudas ke entran en un rio u en un lago de agua yelada. Eyos kreen ke esto traye la buena salud.
A las 12 de la medya noche vyeja, los templos japoneses azen sonar sus kampanas 108 vezes. Es una forma de purifikar 108 dezeos.
Uno de los uzos muy spesyal de Irlanda, es la tradisyon de echar a las puertas un pedaso de pan i este modo trayen la buena shans.
Puerto Rico selebra el anyo muevo en arrondjando kubos de agua.
La intensyon de las famiyas kon este ritual, es liberarse de los problemes del anyo pasado.
En munchos paizes del mundo ay una variedad de rituales a las vistimyentas. En “Brasil” las personas uzan la kolor blanka para protejarsen de las almas malas. En la “China”, la kolor kolorada es utilizada para traer la shans buena. El uzo de la ropa interyor kolor amariya semboliza la rikeza.
Anyos Buenos Keridos Lektores…
