Ya esto demandando a syertos amigos: “ande estavash esta fin de semana?”. El uno me respondyo; “estavamos en Alexandropolis", el otro me disho: “pasimos la entrada del muevo anyo en Bulgaria, en Burgaz”. Otros se estan indo a syertos kazales serka de Edirne en Bulgaria ande ay Casinos.
Deke esto todo? Porke muestro payiz ke tyene lugares muy ermozos esta tan karo i tan yeno de surprizes ke mizmo los sivdadinos se estan espantando para no komer un kazik.
Una semana antes del anyo muevo, mi ijo ke esta estudiando en Toronto/Canada i ke vino a Estanbol para las vakansas del fin de anyo me demando kualo devia de azer kon el oto para irsen kon sus amigos a la Gresia a Aleksandropolis. I le dimos un papel komo ke se puede irse kon la araba i izimos una siguritad internasyonal i yallah. Se fueron i pasaron solo dos diyas. Mizmo si no es kasher toda la djente se van para komer pishkados i frutas de mar (kalamares, karides, midyas i otras kozas). Es siguro ke mizmo si tenemos amigos ke observan la kasherut pueden komer komo se deve…
Un amigo mizmo ke mira la kasherut (el i su mujer) al lugar de ir a la Büyükada i de pagar 3.000 liras por persona, preferaron de pagar serka el mizmo montante; ma se fueron de Kırklareli a la Bulgaria a Burgaz. En un otel de sinko estreas i todo modo de komidas. Puedeser pagaron la mizma koza ma pudyeron ver un payiz muevo: la Bulgaria i Burgaz ke era una sivdad bastante Sefaradi.
Es por esta razon ke los Gregos permetieron a los Turkos de pueder vijitar las izlas Gregas durante 6-7 diyas mizmo si no tyenen Visas Shengen. Ya se ambezaron ke ay dos Turkiyas i dos djeneros de sivdadinos turkos; los blankos i los pretos. Eyos keren los Turkos Blankos. Este enverano las Izlas Gregas van a ser komo kazales Turkos i va ser muy komun de oyir el Turko en kada paso. Mueva moda mos kitaron.
