En los d’alkavos anyos pujo la popularita de la lingua Esperanto seya porke el internet dyo mas posibilidad de ambezar seya porke el dezeyo de konoser munchas linguas pujo. Egziste oy se puede dizir ke el ke kreo el Esperanto es el Dr Eliezer Ludvig Zamenhof, oftalmologo judyo de la sivdad de Bielystok en el imperyo Ruso. Nasido en Tevet en (1859), Eliezer era el ijo el mas grande de una famiya de 9 kriaturas donde el padre i el nono eran profesores de linguas. Eliezer avlava 2 linguas en su chikez, Yidish i Polonezo. En la sivdad de Bialistok aviya en esta epoka Polonezos, Rusos, Almanes, Lituanes, Tatares i otros i siguro Judyos ke formavan el 68% de la populasion. Eliezer vino i entendyo ke aviya muncha difikultad para darsen a entender entre todas estas diferentes komunidades i pensa en una lingua ke sera mas simple la komunikasion entre los moradores de este sentro. En el anyo (1873), la famiya Zamenhof desho su sivdad natal i se enstalaron en Varshovia. En la epoka ande Eliezer estava estudyando en la Universita de Varshovia, el peno a krear una lingua Internasional kon una gramer kompleta para todos. Mas tadre kuando ampeso a ambezarse Ladino, Inglez, Ivrit i Grego entendyo ke esta lingua internasional kale ke tenga una gramer muy simple para ke seya posible eksplikar i dar al mizmo biervo munchas formas i sensyos. En el anyo (1878), la primera version de esta lingua estava pronta. Eliezer no teniya dainda 19 anyos i ansi no pudo publikar su livro en el mizmo anyo. Ampeso a estudyar Medisina en la universita de Mosku i de Varshova i en mizmo tyempo izo parte de grupos Judyos i arekojer sempatias para ovras kalitativas. En (1885) eskapo sus estudyos i ampeso a lavorar komo Oftalmologo en mizmo tyempo en (1887) su livro LINGUA INTERNASIONALA livro de estudyo fundemantal de esta mueva lingua ke aviya kreado i sinyo su livro (Doktor Esperanto). Dr ke espera render siempre krear amistad entre los umanos i ansi nasyo el nombre de esta lingua mueva. Eliezer se kazo kon una jovena kalda. Les nasyo 3 kreaturas: Adam, Sofia, Dilidya ke todos los 3 despues se esparesyeron en la Shoa. Sofia era Dr de kreaturas i Adam Dr de ojos. La mujer de Adam, Vande, sovrebivio la Shoa i kontinuo la tradisyon del esperanto fasta su muerte (1954). Zamentof traduizo en Esperanto munchos livros i eskritos de la literatura mondial i esta okupasion la kontinuyo anyos largos, kaje su vida entera. El eskrivyo tambien poemas en Esperanto i ansi eksprimo sus sentimyentos en una lingua mueva. En el anyo (1905), Zamentof avlo por la primera vez en el primero kongreso mondial de Esperanto ke tuvo lugar en la sivdad Boulogne Sur Mer en Fransa. En (1908) fondo La Asosiasion Esperanto Mondial (Universala Esperanto Asosiya). Kon esto Zamentof no aksepto de ser la kavesa de esta Asosyasion dizyendo ke es solo un Esperantisto. El Dr Zamentof muryo en Varshovia en (1917) i fue enterrado en el Bet Akevarot Judyo. Kada anyo los ke sostyenen, avlan Esperanto i los sempatizantes de esta lingua suven a azer ziyara a la tomba de Zamentof, el kreador de esta lingua mondial una para todos.
