El 7 de Oktobre, 3.000 militanes del Hamas ke biven en Gazza entraron en las tyerras Israelyanas i izieron un masakre terible i syenes i syenes de Israelyanos fueron masakrados i serka de syen i trenta Israelyanos fueron tomados esklavos por los militanos del Hamas. Ya savemos ke una partida toparon la libertad. No se si estan reelmente sanos? Porke les izyeron sufrir dando les yesurines.
Dospues de 100 diyas de gerra, la partida del norte de Gazza kreo ke fue liberado de los militanes del Hamas i todos los Palestinianos estan bivyendo en el sud de Gazza serka de la frontyera del Ejipto.
Durante estos syen diyas se embiyo a Israel 9.000 roketas de Gazza; 2.000 del Libanon i 30 roketas de la Siria. Durante estos diyas 7.653 kamyones de ayudo alkansaron a las dos puertas de Gazza: a Nitsana i a Refah. I dospues ke fueron kontrolados 137.920 tonas de materiel de ayudo i de komer fueron repartidos a los ke biven en Gazza. Ma no se save si la ayuda alkanso al puevlo de Gazza o si fue dado a los militanes del Hamas. Israel esta deklarando ke durante estos syen diyas serka de 9.000 teroristos del Hamas fueron destruidos o matados. Israel organizo atakes a serka de 30.000 puntos militares. Los Israelyanos interrojaron serka de 2.300 prizonyeros. I apanyaron serka de 2.650 personas ke bushkavan. Los 1.300 eran miembros del Hamas.
De la otra vanda vemos ke serka de 24.000 Palestinianos; ombres, mujeres, kriaturas, mizmo personas aedadas fueron matados kon las bombas ke fueron echadas por los Israelyanos. I estan deklarando ke ay mas de 60.000 feridos. Serka de los 80 por syen de los Palestinianos fueron ovligados de abandonar sus kazas i estan bivyendo en tentas serka de la frontiera Ejipsiana; si reusheron a topar una deya.
Ya savemos ke Israel i los militanes del Hamas izyeron un trokamiento de esklavos. Ma no savemos kualo es la situasion de los otros esklavos. Kreo ke una partida no estan bivyendo dainda.
Se esta avlando ke la gerra va kontinuar en la rejion de Han Yunus. Esperamos ke esta gerra va topar fin kon los esforsos del Katar i del Ejipto. Reelmente se deve de reushir en este movimyento para ke se pueda yegar a la PAS entre los payizes.
Oy esta rejion del Medio Oriente es muy emportante para todos. Para los Israelyanos; para los Palestinianos, para el Ejipto; i para esta rejion. Espero ke dospues de este periodo todos van azer esforsos para topar la PAS.
