Kuando el puevlo judio fue ovligado a bivir en el egzilo, los judios se yevaron la fiesta de Tu Bishvat kon eyos, i komo memoria de sus paiz, se yevaron tambien las frutas de Israel.
En el egzilo, kada anyo, kuando viniya esta data, las kazas judias selebravan esta fiesta kon las frutas de Israel; uvas, sevada, muezes, igos, datiles, azitunas, granadas. Estas son las frutas ke forman ‘las siete espesias’ de la tierra de Israel. Los judios, en el egzilo, diziyan ke estas frutas illuminavan los kantones areskuros del egzilo, i ansi, la luz de los sieles de Israel entravan en kada kaza. La dulsuria de estas frutas alivyanava la amargura de la vida del egzilo, i akodrava al puevlo judio, ke la tierra de Israel esta asperando a sus ijos.
Duspues ke los judios tornaron a sus tierra, esta fiesta gano una mueva sinyifikasion. Esta data se tranformo ‘al diya de plantar arvoles’. La Tora dize; ‘I kuando vas a entrar a tu tierra, vas a plantar arvoles de frutas’. Segun la Tora, kortar un arvole, es komo matar una persona.
Kada anyo, Tu Bishvat kaye al 15 del mez de Shevat. Es la fiesta del anyo muevo de los arvoles, i tambien el empesijo de la primavera. Kada anyo selebramos esta fiesta kon toda la famiya reunidos en el entorno del seder. En el seder, komemos estas frutas, en diziendo la Beraha de kada fruta. Tu Bishvat mos da la nuvela del nasimiento de la natura. En esta fiesta, los judios del mundo entero son reunidos en komiendo las mezmas frutas, las frutas del paiz santo, (mezmo los ke biven en los mas yelados lugares), i en diziendo la orasion de la natura.
Los arvoles son emportantes por munchas razones. Eyos mos dan frutas, mos azen solombra en los diyas kayentes, abrigan los animales, dan oksijen i umiditad a la tierra, i evitan la erozyon.
Segun la Tora, ensembrar arvoles es una mitzva. El Dio mos kreo el ganeden, i mozotros kale ke kreamos guertas. Tu Bishvat se fiesta en kada kaza judia, embezando a muestras kreaturas la emportansia de los arvoles i de las plantas, ansi aparejandolos a la vida, eksplikandoles la emportansia de la agrikultura por las personas.
Tu Bishvat mos da otros mesajes tambien. En esta fiesta, en las sinagogas, los rabis mos transmeten los mesajes de Tu Bishvat ke son muy emportantes por la kontinuasion del judaizmo, i por la edukasion de muestras kreaturas: ‘Muestras kreaturas son muestras frutas, i kale ke esten atados a muestras tradisiones, komo son atadas las frutas a los arvoles. Kada arvole, para ke se engrandeska derecho, kale ke seyga kultivado. De mezmo, kale edukar muestras kreaturas, ambezarles muestras fiestas, muestras tradisiones, para ke se engrandeskan derecho. Las frutas ke son atadas buenas a los arvoles, kresen i kedan sanas. De mezmo si edukamos muestras kreaturas, las kreaturas kedan en pies komo los arvoles, i dan ermozas frutas. Ansi, los arvoles mos dan mesajes, mos ambezan komo engrandeser muestras kreaturas. Los arvoles toman sus fuersas de sus raizes, i no se derrokan mezmo en las mas grandes tempestas. De mezma manera, las personas ke tienen kreensia, i dan emportansia a las valores morales, topan la fuersa de gerreyar kon todas las difikultades ke se enkontra en la vida’.
