Los ke meldan mis eskritas me alavan kon el stilo ke eskrivo i se riyen a lo ke es de yorar. Me plaze azer shakayikas, eskrivir lo triste en riyendo. Ma en esta eskrita no topi nada de azer shakas ni de riyir.
En el tyempo de la korona, ya vos akodrash, todo se estava azyendo en zoom. Sovretodo los meldados ke son muy emportante.
Mi kerida amiga i eskritora de la revista Şalom, ŞELİ GAON, en una de sus eskritas, eskrivyo la dejenerasyon de un meldado en zoom. Ken kon pijama, ken kon el telefon djugando i ken espandido la ora ke se estava echando eshkava. Munchos de mozos kritikimos.
Bueno akeos diyas, estavamos en kaza, tuvimos muertos, diyas i diyas kon las notisyas, asperando haberes buenos, no teniyamos keyf de nada. Tyempo pasado es pardonado u no, esto no lo se, lo save solo el Dyo.
Agora no ay ni korona ni pandemiya.
La semana pasada estuve envitada a una fyesta de tefilin en bivo.
Para un padre i una madre es la mas ermoza fyesta. Depende de ti, azes lo ke keres, yamas a ken keres no ay ken se meskle. Por las bodas no puedo dizir la mezma koza. Yo ago loores ke ize dos fyestas de bar mitsva komo kijo mi alma.
Me ekskuzo de todos ke no vos esto azyendo riyir ma si so jurnalista kale ke eskriva la verda.
Demanyana demprano me fui a la keila ETZ AHAYIM de Ortaköy. Kuando entri al kal, muy ermozo, todos vistidos byen elegantes, los tratamyentos maraviya, las nonas orozas de ver este diya, la djente alegre kon karas riyentes. Ke ermozo de ser libres i pueder azer las fyestas.
Kuando empeso la orasyon, malorozamente kedi enkantada de ver la dejenerasyon de mi puevlo, veramente me izo muncha pena.
La ermana del barmitzva byen vistida i muy ermoza, entro mashkando chiklet, komo eya aviya munchas. La boz del hazan no se estava oyendo, no se si es del mikrofon ke no estava bueno u del muhabet de las damas ke estavan avlando en gritando. Kuando se avyo el Ehal, ken en pyes, ken asentada, ken mirando ken kualo se vistyo, ken keshandose ke esta muy kayente, ke el klima no esta lavorando.
Mas de la meatad de los envitados sin ke eskape la orasyon, salyeron de la keila i fueron a dezayunar antes ke vengan los balabayes.
Por aya estan gerreando, mansevos estan peryendo sus vidas para ke mozos estemos libres i ke agamos estas fyestas.
Keridas ermanas i ermanos, mozos kuando vinimos a este punto de vista?
Keridos responsables, vos rogo de meter una tabela a la entrada de las keilas:
“EN EL KAL MASHKAR CHIKLET ES DEFENDIDO”!
De todo modo vos oguro syempre teneremos fyestas, al mansevo una vida larga i ijo de buena ventura.
