Tu Bishvat, el anyo muevo de los arvoles se va fyestar este anyo el 25 del Enero 2024 jueves. El 15 del mez de Shevat es el empesijo de la primavera.
Kada arvole es una bendisyon para el paiz. Kon su ermozura adorna la tyerra i da solombra. Las raizes ke estan a las onduras de la tyerra, salvan de la erozyon.
Deke los arvoles selebran el anyo muevo, mas tadre de mozotros ke selebramos el muestro? Esto tyene una relasyon kon la epoka de las luvyas en Israel, ke empesan kon la fyesta de Sukot. Las luvyas tadran kuatro mezes para alimentar la tyerra, para alimentar los arvoles, para reushir ke den frutas.
Es muy emportante saver esto.
Kada anyo selebramos esta fyesta kon toda la famiya endjuntos. El Seder konsiste de komer frutas muevas i de bever vino, para fyestar el anyo muevo i para fyestar la ayegada proksima de la primavera. Las mezas son yenas de frutas i produktos de la tyerra. Trigo, vino, agranada, azituna, datile, uva, mansana, muez, banana, karota, melon i frutas sekas.
Despues ke se disho todas las berahas i se komyo las frutas, se toma un limon en la mano i en golyendolo se dize una beraha diferente.
Es en Tu-Bishvat ke Dyo, desido ke los arvoles sean fruktiferos, unos de eyos van a kreser, otros se van a sekar i se van a murir.
Egziste una uzansa vyeja ke endika a los padres, sembrar un sedro (sedir) kuando nase un ijo, i un sipres (servi) en el nasimyento de una ija. I en la boda de estos mansevos, los ramos de estos arvoles van a ornar la sinagoga ande se van a kazar.
Esta fyesta afirma la relasyon ke egziste entre el puevlo djudyo i su tyerra. Ya savemos ke el puevlo ebreo fue orijinalmente agrikultor, i tyene un amor profonda por los arvoles. Estas selebrasyones mostran la emportansa ke dan los djudyos a esta fyesta.
Kale demandar esta demanda: Ke es tan sinyifikativo en los arvoles, ke fyestamos sus anyos muevos? La Tora dize: Deke la persona es un arvole de la tyerra? Ke es la sinyifikasyon de esto:
Mos puedemos ambezar de los arvoles kozas muy emportantes para muestra vida.
Los arvoles syempre tyenen una enfluensya pozitiva enriva de la atmosfera, del tyempo i del entorno. Eyos dan frutas, solombra, abrigo a las bestyas, dan oksijen a la tyerra, avizan la erozyon i dan umidita a la tyerra.
“TU BISHVAT” es la fyesta de la Natura.
El arvole es el sembol de la “VIDA” i del “SAVER”.
La Tora, es el orijin de la savidurya, de la konosensya, es el oksijen de los djudyos. Ma la konosensya no tyene valor kuando es sola, kuando no es entornada de otras kozas. Kale tomar fuersas de las tradisyones ke son muestras raises, para pueder tener un futuro reushido.
El ombre es komparado a un arvole del kampo, porke kon sus kualidades syempre el se developa i a la fin i el da frutas, ke son los ijos.
Kale kontinuar a selebrar todas las fyestas, para ke los mansevos se ambezen muestras tradisyones i ke lo realizen fina la fin.
Para kada anyo mijorado!...
