La semana pasada indome a Ankara para la reunioın de una Asosiasion, me ambezi ke el sinyor Henri Benazus; uno de los mas emportantes koleksyonarios de fotografias sovre Atatürk mos desho la buena vida. Era un ombre muy enteresante i los 40 anyos dalkavos de su vida lavoro solo sovre las fotografias sovre Atatürk i eskrivyo livros sovre Atatürk i sovre sus fotografias. En primero devia de eskrivir un artikolo en turko para el Şalom i lo ize. Lo konosia a Henri Benazus. Anyos vinia a la Büyükada kon la kaza ande publikava sus livros i tenian un stand en la plasa en Büyükada i firmava sus livros. El era yeno de emosion. I era muy orozo de firmar sus livros. I kada vez ke lo viya avlavamos sovre sus livros, sovre lo ke estava azyendo. Mizmo organizimos kon el una ekspozision en el Anadolu Kulübü sovre las fotografias de Atatürk. Ya savemos ke era el mas emportante koleksyonaryo sovre las fotos de Atatürk. Kontava ke se fue mizmo a Washington para merkar dos fotografias sovre Atatürk. Eran dos fotografias travadas por el padre ke era djurnalisto i ke avia realizado un reportaje kon Atatürk 30 o 35 anyos antes. Dospues ke sintio la istoria de las fotos i ke fue siguro ke reelmente eran fotos orijinales, las merko imediatamente sin pensar pagando una fortuna. Dospues ke las merko, torno a İzmir kon el primer avion.
Kuando tuve de menester de fotografias de Atatürk sovre la Büyükada o sovre el Anadolu Kulübü le embiyava un e-mail i le demandava lo ke keria; i me embiyava un diya dospues las fotografias ke teniya de menester. Un anyo antes, un amigo me disho ke le demande una partida de sus fotografias de su koleksiyon para el Muzeo Djudio. Es en el e-mail dalkavo ke m’eskrivio ke no egziste fotografias spesiales kon los Djudios o kon las minoridades relijiozas.
Benazus si keria vender su koleksion puediya arekojer buen karar de paras. Ma el prefero de dar sus fotografias al Muzeo de Atatürk i a la Munisipalidad de Izmir. Son eyos ke le ayudaron kuando tuvo problemes en su echo. Benazus era uno de los mas emportantes produktores de guevos en Turkiya. Su marka era Yu-Pi. Vemos en Turkiya ke munchas kompanyias komersiales ke lavoran kon las gaynas i los guevos se azen rikos en poko tyempo. I pueden pedrer buen karar de paras en poko tyempo. Benazus era dirijente del Klub Altay de Izmir. I dos anyos era el prezidente del klub entre los anyos 1985-87.
Es el anyo pasado ke la Munisipalidad de Izmir dyo a una kaye el nombre de “Henri Benazus”.
Henri Benazus, ke tu alma repoze en Gan Eden.
