Es el titolo de una piesa ke eskrivio Anton Chehov, uno de los mas famozos otores de Rusia. Las guertas, simbolos de rikeza i orgulio de la Rusia antigua, eran propriedades familiales. Los rekuerdos akumulados durante generasyones fueron la razon del amor de los patrones por sus kazas.
Chehov mos projekta la vida en su paiz a la fin del siglo XIX. Esta grande guerta familial estava en deklino i los aristokrates ke bivian ayi, no tenian bastantes paras para pagar las devdas. Eran tanto auzados a bivir sin kuenta, ke kuando empesaron los problemes finasieros no savian komo arreglarlos. En la famiya, en el tiempo de sus padres avia un servidor, Lopajin, ke torno a ser komersante i vinia para konsejarlos lo ke devian azer. El pensava ke deven de konstruir, en esta guerta, kazas para alkilar en el enverano a los turistos, para tener un revinido. Asi obtiendran ganansias para kuvrir sus devdas. A los ermanos aristokrates (Luibov i Gaiev), este proyekto les vino muy vulgar. Para eyos, alkilar kazas era bastante dolorozo, ma tomar una desizion ekonomika serioza era mas difisil. No saviendo kualo azer, los aristokrates sigen sus vidas luksuozas, gastando sin kontrol. Eyos kontinuan a baylar, kantar, bever, azer piknikes komo si no avia dinguna ansia. A la fin, este servidor, Lopajin, les anunsia ke en la vendidad, es el mizmo ke merko la propriedad i ke va fraguar kazas para alkilar durante las vakasiones.
En esta istorya, el otor mos amostra el deklino ekonomiko i la desaparision de las klases sosiales, i ke los ijos de los servidores toman el lugar de los viejos rikos. Vemos ke un muevo orden se empesa a sintir en todas las kazas aristokrates. Los ke no son kapaches de adaptarsen al muevo orden del mundo, es una drama i la vida no tiene respekto por este tipo de personas. En muestros dias i siempre sera asi, “no ay vida sin esfuerso”. Chehov, doktor en mizmo tiempo, analizo la sosiedad de su epoka komo un mediko analiza a su pasiente.
El dinero deve de ser respektado, no para ser riko, ma para tener respekto personal i para ayudar a mijorarse durante la vida entera. Viva la salud mental i korporal…
