La vida aktual esta trayendo a las personas, un pezgo diferente del pasado. Oy en dia tenemos rolos diferentes aryento de muestro viaje de la vida. En mizmo tiempo semos, madre o padre, ijo o ija, patron de un echo o lavorante, vizino, amigo…
Debasho de este chadir, estamos kaminando para no aferrarmos al pedrisko. Un kamino yeno de difikultades ama en mizmo tiempo un kamino ke mozotros eskojimos. Keremos korrer, azer i parvinir.
En primero, ser ijo o ija en este kamino es lo mas fasil. Si tyenes kozas de menester ya topas una mano avyerta, te azen todo lo ke keres de korason. Te toman el pezgo de tus ombros. Viene un tiempo, tu madre, o tu padre se meten debasho de tu chadir. Agora sos mas aedado, kale ke kamines mas avagar ama el chadir no se esta azyendo mas chiko. Al kontraryo agora de ti keren una mano avyerta tus inyetos. Agora sos en los medyanos de tu edad ama sos ovligada de korrer i a tu famiya para dirijarlos seya al doktor seya para azer empleos i en este kaos i lo mas importante, keren de ti tiempo para azer un poko de sohbet, bever kon ti un kafe, keren kaminar en el bodre de la mar kon tu braso.
Kale ke tengas un chadir bien grande i bien poderozo. Puedes takilearte a unas pyedras, no emporta si esta tu chadir bien protejado.
Agora para tener un chadir protejado devemos pizar fuerte a la tierra. Keridos lektores, ay un konsepto, sovre esto se dize VUCA. En 1987, W. Bennis i B. Nanus lo prononsiaron primera vez. Despues en los 2000 la armada de USA lo uzo en los tiempos de la gerra fria. VUCA kontiene kuatro konseptos. Volatility es variabilidad. Uncertainty es indeterminedad. Complexity es kompleksidad. Ambiguity es ambiguidad. Vuca se kullanea mas muncho en los echos ekonomikos ama se entegro en toda la vida. Vuca kontiene dos konseptos. Pozitivo i negativo. Yo vos va kontar del pozitivo.
El braso pozitivo del VUCA mos konta un optimizmo realista para darle un sentido realista por pasar de todas las difikultades, i adaptarse kon optimizmo. Aunke no estamos en un periodo fasil, mos ayuda a todos en el kamino indeterminado. Mos ofrese oportunidad para tener una vizyon klara i net, entemdimyento, ganar de mirar a las difikultades netas, i ser bivos en el kamino. Variabilidad, Heraklitos dize: todo se troka, lo ke no se troka es el trokamyento. Aryento del trokamyento kale estar kon una armonía, konkordato kon los trokamyentos komo baylando un vals. Indeterminidad, en la vida no ay nada seguro, kada punto la situasyon puede trokar, puedes tomar ayudo de tus kerensyozos, amigos, de tus ijos. Si tenemos una famiya kerensyoza podemos suportar a las difikultades. Si ay kaos, kompleksidad, detente i echa un ojo a lo ke ay. Kualo esta afitando. Mira de ariva, de afuera del kavzo i avla, dize, si estas kansado, ajitado, en merikiya. No seas timido de dizir “agora en este minuto no esto puedyendo salir a bash.” Avlar es entender afilu de si para si afilu al denfrente.
VUCA, kon las ke traye a las personas, es una ventana grande ser kapachi de salir a bash kon las difikultades de la vida.
“Yad” kon su proyekto de “apoyo a los kudyaderos de sus famiyas” kon el konosimento de la VUCA esta parvinyendo a azer apoyo ke sean ijos o ijas de medyanos edades i tienen responsabilidad de mirar madre i padre aedados o tienen miembros dezaktivados en sus famiyas. Para tomar ayuda de este proyekto puedes telefonar a: 0531) 592 72 73 o (0553) 748 84 85 .
