La artista Sarah Silverman esta diziendo ke ‘los aktores ke estan djugando los rolos judios deven de ser aktores judios. Si este aktor esta reprezantando un karakter judio, el deve de tener una ‘kara judiya’.
Silverman se esta opozando ke rolos emportantes judios estan reprezantados por aktores non-judios. Esta sitando Hellen Mirren, por egzempyo, enterpretando a Golda Meir en un filmo biografiko, ‘Golda’, i Bradley Cooper enterpretando a Leonard Bernstein en ‘Maestro’, el filmo ke él propio dirijo. En este filmo, Cooper resivio kritikas por la grande nariz proteza.
Esta lista es muy larga. En una epoka en la kuala la djente esta ultrasensivle a las kestiones relasionadas kon la inkluzion, la diversidad i la aprobasion kultural, kritikos estan sinyalando el standard doble kuando se trata de judios.
Es ke la solusion de Silverman esta korekta? Es ke solo aktores judios pueden djugar rolos judios? No es korekto. Kale eskojer el mijor aktor para el rolo ke va enterpretar, independente de su raza, orientasion o relijion. Aktuar es el arte de reprezentar de manera persuazivo a ser akeya persona ke en realita el no es. Hellen Mirren fue una grande Golda Meir: i Bradley Cooper fue un perfekto Leonard Bernstein. Dinguno de los dos no tuvieron menester de ser judios para reprezantar estos dos rolos de manera efikaz.
No ay menester de ser un grande aktor. La konsiderasion prinsipal en el kasting es la kredibilidad. Es ke este aktor va pueder djugar este rolo de una manera persuasiva? Meryl Streep gano un Emmy por la mijor artista prinsipal en en el filmo ‘Angels in America’, ande djugo el rolo de un rabino i de una fantasma: Ethel Rosenberg: dos judios, i el uno siendo un ombre. El aktor, Sacha Baron Cohen, un judio, djugo el rolo de Borat, un torpe periodisto antisemito de Kazakistan. Un otro aktor gay, Neil Patrick Harris, enterpreto un ojetero en la seri ‘Komo Konosi a Vuestra Madre’.
La konsiderasion, antes de todo, es la kredibilidad. Eskojer Emma Stone para ‘Aloha de Cameron Crowe’ resivio kritikas korektas, porke esta artista muy blanka no parese a una mujer china. No estava kreivle.
La kolora detras de la ‘Kara judia’ esta orientada yerrada. Si, Hollywood deve eliminar el doble standard, ma aziendolo teniendo en kuento un faktor; ken es el mijor aktor ke va pueder enterpretar este rolo de manera mas persuasivo?
No konfunderemos la kestion de la kara judia kon la apropiasion kultural. Este anyo se produizo una grande kantidad de seris i filmos ke estan kontando istorias judias verdaderas. Solo Spielberg i Tony Kushner pudian eskrivir Los Fabelman, i solo el eskritor i direktor, James Gray puedia krear Armageddon Time, sovre una famiya judia en Queens en 1980. Si un non-judio eskrivia estas istorias intimas sovre una minorita a la kuala el no apartiene, el rolo no iva ser verdadero. Esto no es su propria istoria ke el va kontar; no puede azerla kreivle. Ma si un aktor no judio ke esta enterpretando a un judio, el ya save ke esta solo djugando un rolo, no esta kontando la istoria de su vida, i si djugo bueno, traye onor al filmo. Por egzemplo, un aktor judio del Medio Oriente puede enterpretar el rolo de un arabo de una manera persuasivo. El aktor judio Ari'el Stachel gano un Tony por el Mijor Aktor en el filmo The Band's Visit, ande djugo el rolo de Haled, un muziko de jazz ejipsiano.
Komo judios, guardraremos muestras keshas para las krizas verdaderas ke devemos akodrarmos urjentamente...
