Yitro, esfuegro de Moshe Rabenu, tuvyendo avizo de todo lo ke paso dizde ke salyo Israel del Ejipto, i todos los mirakolos ke izo el Kriyador a los djudyos por mano de Moshe, toma a Tsipora, su ija, mujer de Moshe i a sus dos ijos, Gershom i Eliezer, i se va a el dizyerto al monte de Horev, por verlo a Moshe i alegrarsen kon el i saver todo lo ke se paso.
Arivando al monte de Horev, mando avizarle a Moshe su vinida. Tuvyendo Moshe Rabenu avizo de la vinida de su esfuegro, salyo de Refidim a su enkontro el i todos los grandes personajes de Israel. Lo resivyo kon grande respekto. Le izo las onores menesterozas i le konto todo el pasado dizde el diya ke se espartyo de el.
Yitro se alegro muncho de sintir todo esto, i bendisho a el Kriyador en rengrasyondo i rekonosyendolo komo sinyor de todo el mundo. Resivyo sovre si, de kreer en el solamente, i guadrar sus enkomendansas i estuvo en el dizyerto kon Moshe Rabenu. De todas las gloryas i milagros ke vido el puevlo, la mas alta i enshalshada fue la resividura de la Ley Santa en el monte de Sinay. La kuala es un pasaje muy seryozo i muy enportante en el pasaje de el puevlo djudyo.
Despues de un mez i medyo ke salyo el puevlo djudyo del Ejipto, en el primo de el mez de Sivan partyeron de Refidim i arivaron a el dizyerto de Sinay. Pozaron enfrente del monte Sinay.
Ayi deklara el Todo Poderozo a el publiko por boka de Moshe Rabenu ke el Kriyador eskojo en esta puevlo. Ansi deklara dizyendo:
Vozotros vitesh muy bien lo ke ize por vozotros a los ejipsyanos, i komo vos trushe asta aki. Kon muncha siguridad komo sovre alas de agilas. Agora si vozotros keresh ovedeser mis ordenes i konservash mi firmamyento ke ize de vozotros de ser mi puevlo fidel, vozotros seresh muy keridos, a kondisyon ke devesh de ser una nasyon de Koanim, sirvidores de el Dyo, i un puevlo santo.
Sintyendo estas palavras el puevlo de boka de Moshe Rabenu respondyeron todos a una mente, kon un grande entusyasmo, todo lo ke enkomenda el Kriyador vamos a ovedeser.
Moshe Rabenu aze saver a el puevlo la veluntad de el Kriyador ke kere apareser su onra delantre de todo el puevlo, en el monte de Sinay i darles la ley por su boka mizma i ke eyos deven santefikarsen.
El puevlo se syenten muy venturozos, de esta favor de el Kriyador. El diya del 6 Sivan se sintyo unas bozes estremesivles de turuelos i relampagos i una boz de Shofar muy temeroza. Una nuve kuvriya el monte, todo el puevlo se estremesyeron.
Estonses se sintyo una boz muy temeroza afuera de la natura, ke se sintiya de la punta de el monte ke enkomendava a el puevlo djudyo, los dyes komandamyentos, “Aseret adiberot.”.
