El desastre de “STRUMA” fue el undimyento en el 24 de febrero del anyo 1942 de este vapor. Estava yevando 800 refujyados djudyos fuyendosen del Holokosto Nazi, de la Rumaniya a la Palestina.
Era un vapor chiko ke teniya un motor diesel de sigunda mano, ke no se puediya konfiar a yevar tanta djente. Este barko fue abandonado en la “Mar Preta”, en frente del bodre turko del Bosfor, porke Turkiya refuzo de ayudarles, de dar un apoyo para ke se salven.
En el anyo 1941, el vapor fue vendido por la ultima vez, a la Kompanyia Mediterranea de Vapores, i fue enrejistrada kon la bandyera de Panama, kon el nombre de Struma, ke era el nombre de un rio bulgaro. El 23 de febrero, las otoritades turkas abandonaron el Struma. La demanyana del 24 de febrero, el submarino sovyetiko lo undyo kon un torpido. Malorozamente se undyo muy presto kon la djente aryento, gritando, yorando fina ke se aogaron. Todos se muryeron, solamente David Stoliar, mansevo de 19 anyos, fue el uniko ke fue salvado de este dezastre. David Stoliar se muryo en el anyo 2014 a la edad de 91 anyos.
Struma fue el mas grande dezastre maritimo de la sigunda gerra mundial. La trajediya de Struma fue ke los turkos los detenyeron durante dos mezes i medyo, sin ayudar, en estado de karantina, sin pueder tokar el porto.
Los refujyados sufriyeron sin tener ni pan para komer, de todas las privasyones i arrebashamyentos.
La unika ayuda ke risivyeron fue de la komunita judia turka en Estambol, mizmo ke teniyan el risko de pedrer sus libertades, esta komunidad dyo un grande apoyo a los refujyados i izo todo el posivle para alivyanar un poko sus dolores.
Los ofisyales de la marina turka, eksplikaron ke no puediyan permeter de dar la permisyon a Struma malorozamente. Mas tadre deviyan de kontinuar a sus viajes, verso sus destinos inkonosido porke, los inglezes no estavan permetyendo de dar vizas a los djudyos. Fina akel tyempo los inglezes se konosiyan komo fideles a las leyes del “Imperyo Britaniko”.
En el anyo 1939, aviyan desidado ke la entrada de los djudyos a Palestina era defendida.
La mizerya ke bivyeron estos djudyos, persegidos, rejetados i meprizados por todos, ombres, mujeres i chikos ke se aviyan sonyado de ayegar a la “Tyerra Prometida”, ande ivan a azer sus orasyones liberamente, malorozamente entendyeron ke sus suenyos se ivan a despareser en este orizonte deskonosido ande los desharon abandonados.
Lo ke bivyeron ambyertos de liberta i pas, es una mizerya umana porke:
· Los alemanes los mataron,
· Los turkos los tuvyeron en karantina,
· Los inglezes no desharon ke entren a la tyerra prometida,
· Los rusos los enterraron bivos, bivos
En kada 24 del febrero se esta selebrando del anyo 2015 fina oy por el governador de Estambol, i kon el apoyo de la komunita djudiya de Turkiya, una seremoniya en “Sarayburnu” para akodrarmos de este evenemento triste.
