La semana pasada izimos el seder de Tu Bishvat. Kada vez ke viene este diya me viene al tino mi chikez. Me akodro teniya 11 o 12 anyos. En la Mahazike Tora iziyamos el Tu bishvat. Mos aprontavan los morés, aviya un prezentador ke prezentava el koro ke van a kantar las kantikas de Tu Bişvat, yamava a un amigo ke va kontar konsejikas por este diya i tambiyen a otro ijiko para ke melde poezias. Por este diya mos aprontavamos kaje de 2 mezes de antes. Yo teniya boz ermoza, por esto estava en el koro. Ya vino el diya ke vamos azer
el espektakulo. Diya de shabat, despues de la minha kuando aziyamos seuda shelishi keresh el amigo ke iva azer la prezentasyon ke se aga hazino i ke no venga? No demandesh; los morés, todos las karas pretas! Ke vamos azer? Ya mos aparejimos tanto. Las madres i los padres kon las gramamas i los granpapas ya estavan en el salon. En supito, el moré Haleva ke es agora el Gran Rabino, salyo delantre de mozotros i disho, Yakoviko tu vas azer oy la prezentasyon. Porke el amigo vuestro no va pueder vinir, esta hazino. Empesi a riyirme. Amore komo va azer, no tengo memorizasyon de todo. Ya se el sujeto ma todo de kavesa no lo se. No ay nada ,Yakoviko tu ya bedjereyas, yo ya lo se, sos kapachi de este modo de kozas. I ansina fue. Me kitaron ensima de una siya, empesi a kontar el program. Me esto akodrando ke estava komo Orhan Boran. Una konsejika, una beraha de una fruta, una kantika de Tu bishvat. I bedjereyimos el diya muy bueno. I de akel diya fin oy esto en las shenas. Kuando kantando, kuando baylando, kuando kontando. Vidas largas i buenas ke tenga el amore Haleva; el es ke me echo a las shenas fin oy en diya.
