Alguna vez te asentates a komer en un restorante de karne kon tus amigos, i uno de eyos le demando al garson si tienen algun plato vejetariano? Kreyo ke ralo ma si. El vejetarianizmo esta kresiendo en los tiempos de alkavo. Kada dia mas personas se konsideran vejetarianos. Agora en kada restorante esto sigura ke un plato o un menu de vejetarianos vos estara asperando. Ay tanbien personas ke si no son vejetarianos reel, adoptan esta forma de vida al menos dos o tres vezes a la semana.
Alora, ken es realmente vejetariano? Un vejetariano es una persona ke evita de komer produktos de animales. Deke estas personas se defenden de komer animales, kon sus propria voluntad? Algunos pensan ke si los umanos pueden bivir i pueden estar sanos sin komer animales, deke deven de matarlos i kavzarles sufrimiento. Se puede bivir en komiendo una grande kantidad de alimentos diferentes ke kontienen los elementos emportantes para el organizmo, sin matar animales. Es posivle bivir sin meter gaynas o biftekes al menü. Sigun los vejetarianos no ay dinguna razon ke sufran los animales para ke mozotros los umanos puedamos komer kozas mas savrozas.
Para eyos, dizen ke una dieta ke no es bazada en animales, es una alimentasyon mijor i mas sana. En otras palavras, el vejetariano es una persona mas sana ke akel ke kome karne. Munchos estudios realizados en estos dalkavos anyos, enfortesen esta opinion. Por egzemplo, los vejetarianos no sufren de obesidad. Esto lo deven a ke komen alimentos ke tienen muncha fibra dietika i kaloriyas bashas, komo frutas i vedruras. La mayoriya de los vejetarianos sufren manko de enfermedades kardiakas, diabet, ke provienen de la obesidad. Otros estudios demostraron ke los vejetarianos tienen un risko muncho mas manko de tener siertos tipos de kanser, ke los ke no son vejetarianos. Se vido ke los vejetarianos adoptan una vida mas saludosa, kon spor, sin fumar i sin alkol.
Al lado de la forma de bivir i alimentarsen los vejetarianos, ke no vos pareska ke eyos son muncho mas saludozos ke los ke no son. Por egzemplo si komesh diya entero djipses, ke ya no es koza de animales, ya sosh vejetarianos ma no sosh saludozos del todo. Al lado de todo lo ke komesh, kale ke tomash suplementos nutrisyonales komo fierro i la vitamina B12. Estas vitaminas no se enkontran en kantidades sufisientes en los produktos vejetales. Aparte de esto kale ke mensionesh a vuestro mediko, ke tenesh una forma de alimentasyon semejante, ansina el puede tener de menester de azer una analiza para saver si ay algun elemento manko.
Si algun diya pensash azervos vejetariano, ke sepash ke los animales vos van rengrasiar de alma i de korason.
Nota: Yo no so vejeteriana.
