Los muevos kazados vinieron a Berlín komo estudiantes; dos judíos letones ke kerian azersen famozos en el ramo de muzika. En 1934, djusto despues de ke Adolf Hitler tomo el kontrol de Alemanya, la mueva kazada kedo prenyada. Los dos eran kantadores. El ombre, Jacob Levinsons, teniya una boz de bariton. Su mujer, Pauline Levinsons, aviya estudiado en el renombrado Konservatorio de Riga en Letonia. Jacob aksepto un posto en una opera lokal i adopto el nombre artistiko de Yasha Lenssen. Era la epoka ke el antisemitizmo estava pujando en Berlín, i kuando deskuvrieron ke su nombre era Levinsons, desidaron de kanselar su kontrato”.
Ampesaron a bivir en una kamareta muy, muy estrecha. El bebe Hessy Levinsons nasio en el 17 de mayo de 1934. Era muy ermoza kreatura. Kuando tuvo 6 mezes, la madre i el padre se desidaron de travarle una fotografia. La yevaron a un fotografo: uno de los mijores en Berlín. El fotografo izo un kadro muy ermozo. El kadro les plazyo tanto ke lo enkolgaron enriva del piano ke el ombre aviya regalado a su mujer despues del nasimiento de Hessy.
Un diya la mosa del apartamento les disho, "Vide a Hessy en el kapak de una revista en la sivdad". La madre de Hessy disho ke esto es emposivle, i ke munchos bebes tienen el mizmo aspekto. No, disho la mosa. “Definitivamente es Hessy. Es esta foto. Dame paras i te va merkar la revista". La mujer vino kon la revista en la mano. El titolo del kapak era “El Sol en la Kaza”. Debasho del titolo aviyan metido le foto de Hessy, la mizma ke estava enriva del piano.
La revista era una revista nazi. Las pajinas estavan yenas de “ombres kon svastikas” i las fotos de Hitler, inspektando las trupas. Los Levinsons se espantaron muncho. Deke metieron la foto de su ija judia en el kapak de una revista nazi alavando el eroizmo de Hitler?
Se fueron a avlar kon el fotografo. “Kualo es esto?", disho la madre. "'Komo fue esto?" El fotografo les disho de estarsen kayados. “Vos va kontar agora. 'Me demandaron de darles las 10 mas ermozas fotografias para un konkurso de ermozura organizado por los nazis. Tambien les demandaron la mizma koza a los otros 10 fotografos de Alemanya. Entonses los 10 fotografos embiaron sus 10 mijores fotografias. Entre la diez fotografias, embiyi tambien la foto de tu bebe. “'Ya saviyas ke es la fotografiya de un bebe judio?'”, demando la madre. “'Sí'”, disho el fotografo. "Esto era una kompetision para amostrar el 'egzamplo perfekto de la raza aria’ para propajar la filosofia nazi. Kije permeterme el plazer de esta shaka. Vitesh, tenia razon. De todos los bebes, eskojeron a tu ija komo el ario perfekto”.
Profesora Hessy Levinson guadro una grande kantidad de fotografias ke la estavan amostrando en numerozas publikasiones. En las semanas sigientes, la fotografiya estava en todas las partes. En las vitrinas, en las publisidades, i en las kartpostales.
“Agora puedo riirme a esto”, disho Hessy Levinson. Hessy Levinson se izo profesora de kimika en la Universidad de St. John en New York. "Si los nazis saviyan ke era una fotografia miya, agora no iva estar biva".
