Esta semana me se dio kon el tema de “ideolojia”. Kuando empesi a investigar, vide ke es un pozo sin fin. Me dishe, ke echo tienes de eskrivir sovre un sujeto tan komplikado i lo deshi. Despues de unos kuantos dias pensi ke es bueno de kompartir lo ke me ambezi.
La nosion de ideolojia es similar a la vizion del mundo. Es la formasion de las ideas a partir de la observasion, de la eksperiensia i de lo ke uno meldo. En mizmo tiempo es una analiza de los sentimientos de la persona para entender su egzistensia. Son ideas fundamentales ke karakterizan el pensamiento del umano. Sierve a observar los evenemientos sosiales, politikos, ekonomikos i kulturales ke enkontra en su vida de kada dia. Por egzempio, una persona ke adopta una ideolojia pasifista en su vida, se opozara a la gerra, al militarizmo, respektara los kostumbres de los otros, se revoltara kontra las indjustisias i se esforsara a entender la manera de bivir de otros puevlos.
Este termino de “ideolojia” fue kreado por un filozofo fransez, Destutt de Tracy, un aristokrato, soldado i filozofo, ke bivio en el tiempo de Napoléon. El eskrivio un livro “Projet d’elements d’ideologie” (1801) para eksplikar de una mueva forma la siensia de las ideas.
La palavra “ideolojia” fue arebivida en el siglo 20 por los filozofos Karl Marx i Engels, ke lo empleyaron por la primera vez en la ideolojia almana. Por Marx, la ideolojia es un konsepto ke es serka de la verdad, destinado a konvenser los puevlos para ke aksepten intereses de una klase dominante.
De todo lo ke meldi, kije entender ke kuando estas muy atada a una ideolojia puedes pedrer tu libre pensamiento i te puedes fanatizar sovre ideas de esta ideolojia. Es el empesijo de ser esklavo de un sierto grupo. El meoyo se olvida de azer su propio djuzgamiento i esta al servisio del grupo. Asi esta el mundo dividido, porke las novelas en las gazetas i en las televiziones mos keren ipnotizar, para ke kreyamos a sus dichas. Kon tiempo estamos perdiendo muestra konfiensia personal, i grupos enteros de personas estamos repetiendo todo los ke mos estan diktando. La libertad de pensar mos esta abandonando. Muestra analiza sovre otras personas, esta al servisio de la ideolojia i asi empesa la divizion de los puevlos. La ideolojia esta tomando el kamino del fanatizmo i mos estamos olvidando de konsiderar las personas segun sus valores.
Todas las personas tienen el derecho de ekspresar sus ideas. El dever de una persona sivilizada es de bushkar el bien komun, kon todos i para el bien de todos, i de pueder bivir segun su proyekto i su vokasion.
“El maestro ke es sinsero, projetara a los disiplos i les ayudara a topar sus propias libertades, ma si el mizmo esta aferrado a una ideolojia ke esta en una forma dogmatika o egoista, esto sera imposible”. Krishnamurti
